「股市」
相信大家都留意到最近個股市係咁升係咁升！先唔好理背後有咩嘢嘅原因導致個市係咁升，咁嘅市況仲有人追貨先係問題！嚟班人真係好鬼勇同唔識死！個市咁癲仲同佢玩個啲一係就係大鱷，再唔係就係無經歷過股災嘅後生仔。古語有云，當平時身邊啲師奶日又講股市，夜又講股市嘅時候，嚟個就係股市就快跌嘅時候！
「丁蟹」
無綫都唔知係唔係玩嘢！早唔重播，遲唔重播，嚟個時候走嚟播「大時代」！如果你唔知邊個係「丁蟹」或者乜嘢係「丁蟹效應」嘅話，咁就認真抵打！連外國人都認識「丁蟹效應」係乜嘅時候就知「丁蟹」有幾犀利！「秋官」一出誰與爭鋒呢？每次有「鄭少秋」做嘅電視劇，就算重播都好，個股市都會跌。所以無綫係唔係想話比大家聽個下星期市會跌？
「數據」
講到無人信，好多人真係攞返咁多年嘅歷史數據去證明「丁蟹效應」嘅存在！只要去「維基百科」就搵到大部份有「秋官」演出嘅電視劇嘅播映時間同股市嘅表現。睇完真係唔好唔信邪，唔係大跌都小跌，所以話「丁蟹」真係好勁！講真嚟個有可能係股民嘅心理作用多過乜嘢效應。但係點都好，大家小心入市啦！唔好咁搏呀！
