「按摩」
其實好多年前，因為做嘢太博，條頸同膊頭都開始痛。加上越嚟越懶，就連運動都越嚟越少做。日積月累變成勞損，所以就開始每個星期去做按摩。因為係內地做按摩價錢唔係太貴所以問題無太惡化落去。不過返到嚟香港就真係太貴無辦法個個星期去做，每次都係頂唔順先捨得走去按下，舒緩啲痛楚。
「拔罐」
當按摩開始對個問題再無乜太大嘅幫助嘅時候，就開始試做拔罐。好多人會覺得好痛，但係我就覺得好舒服。除咗做完會瘀咗之外，拔罐對於疏緩肌肉嘅彊硬疼痛，效果係唔錯。當然除咗留罐之外，走罐都係我會常做嘅嘢。當然拔罐唔可以日日做，因為要等啲瘀散咗之後先可以再做。當然有時做完之後啲瘀痕會出現深紫色，都咪話唔恐怖。
「針灸」
因為開始覺得拔罐都小兒科同舒緩痛楚唔係大有用嘅時候就開始去做針灸。做完係鬆咗好多，而有時係要做晒按摩，拔罐同針灸先有用。做針灸一定要搵啲有牌嘅中醫，因為你都咪話冇危險。睇戲都有得你睇啦！不過因為針灸會比較深入皮膚，所以落針嘅時候係有少少俾嘢拮嘅感覺。再加埋電嘅話真係無得頂。無論點都好，都係希望唔好因為痛楚影響工作！
