「舞獅」
每年農曆新年，舞獅一定係開市嘅重要環節。而香港一般見到嘅都係「南獅」又稱為「醒獅」或「廣東獅」，造型較為威猛，舞動時注重功架。南獅主要係靠舞者嘅動作表現出獅子神態，一般只會兩個人舞一頭。獅頭多數係以戲曲面譜作鑒，色彩艷麗，製造考究；眼簾、嘴同耳仔都可以動。
「細路」
仲記得細個讀書嘅時候係一個肥仔，所以老師搵咗我做「大頭佛」。當然嗰陣時唔知係乜嘢嚟，淨係知道好好玩，好得意。最重要嘅就當然行係隻舞獅嘅最前面啦！不過大咗先知道「大頭佛」其實係如來佛，因為神話入面講如來佛將食村民嘅獅子引走咗，所以南獅中都會有「大頭佛」帶引領獅子。
「採青」
舞獅又點少得「採青」嚟個重頭戲呀？原來相傳「採青」係有「反清復明」嘅意思意。不過依家都係取其意頭，有「生猛」，生意興隆嘅象徵。所以係農曆新年，舞獅都會去每家每戶拍門攞利是。「青」一般用生菜，而為咗增加娛樂性，就會將生菜同利是掛到好高！獅子會係「青」嘅前面跳幾嘢，表現好猶豫咁，不過然後就會跳起，再將青菜一啖食咗，咬碎咗之後再吐返出嚟，同大家致意。
