「石屎森林」
「點解」
因為好驚有一日香港會變到同大陸一樣，好驚香港人係香港唔再有立足之地，好驚香港人未來會被中共呢個冇誠信又唔講人權嘅政府統治。同時我唔想香港繼續窮得只剩下錢，好希望香港可以好似台灣咁，擁有一個有自己本土特色嘅文化界，令創作者能夠有更多機會發展，我自己亦能夠將自己最擅長嘅嘢貢獻返比社會。而要呢一切發生嘅話，香港一定要有真普選，出現一個會真正傾聽民意，而非只望向北方同利益嘅政府。
「感受」
我諗好多人感受最深嘅都係928嘅催淚彈，雖然我當日隔住電視機都感受到嗰種震憾同恐懼，但係如果要講「最」，令我感受最深嘅應該係926當晩去公民廣場支援嘅群眾。嗰晩我係facebook睇住文字同圖片直播，見到好多人去咗支援身在公民廣場，被警察困住嘅人群，睇住佢地釣啲雨傘同水入公民廣場，我喊咗好耐。可能係因為感動，感受到香港人好温暖，我以呢個身份為榮，亦都可能係因為我為安坐家中嘅自己慚愧。其實我仍然唔係好解釋到我嗰陣嘅感受，但係我依家知道嘅係，呢八十幾日同嗰晩改變咗以前連同父母講我自己想法都驚嘅我，我以後唔會再比自己驚，一定要為自己覺得有意義嘅事企出嚟爭取。
「期望」
我希望有更多人可以受感動，改變，唔再政治冷感同只睇一方面就下定論。最希望香港能夠有真普選，因為香港人係值得擁有一個會傾聽我哋嘅聲音，而唔係滿口謊言而且門常關嘅政府。民主唔係最完美嘅制度，但係至少係目前為止最能保障人民權利與自由嘅制度。最後最後嘅期望係我希望民主能夠係華人社會遍地開花。雨傘是一朵朵的花，不枯也不散！！
