「開心」
忍咗幾個月終於講得，我好少守唔到秘密，但係原來開心嘢都真係都真係幾難忍。無法形容嘅開心得兩種，一個係終生大事，另一個係新生命嘅來臨。每次都好期待去見醫生，因為感覺好奇妙。雖然身邊好多朋友都經歷過，但係自己經歷嘅係唔同啲。生命真係其妙同珍貴。所以要好好保護！
「擔心」
幸福唔係必然嘅嘢，所以唔擔心係假，因為生命嘅脆弱。有時覺得好似打機咁，要過五關斬六仗先可以迎接新生命。由其係當你身邊嗰個擔心嘅時候，自己都一樣，但係表面就扮到唔擔心嘅樣實質咪又係一樣。好彩係依家啲醫院床位同奶粉供應好返少少，不過經歷過嘅人會知道仲有大把嘢要擔心。當然現今嘅香港環境都係。
「憂心」
最憂心嘅當然係兒女嘅將來。係香港咁嘅環境下長大，唔憂心都唔得。個政府就係鐘意攞我哋嘅下一代嚟玩，包括語言教學，三三四，國民教育，强迫內地交流，等等。嚟啲只係教育方面，仲有生活同社會價值觀。要憂心嘅真係數唔晒，淨係希望自己盡最大努力去俾最好嘅嘢佢同教導佢。所以老人家嘅嘢真係啱：「養兒一百歲，長憂九十九」
