「歌手」
嚟幾日「我是歌手」第三季又變成熱話，原因係「陳潔儀」俾人叮走咗。就連鄭中基同何韻詩都發表咗佢哋嘅睇法。雖然我無睇過第一集，但係第二集因為一個鄧紫棋，就變咗一個全城焦點。講真個個上得去都係歌手，仲要個個有名。咁點解要將自己嘅名望攞去賭一鋪呢？有啲我明，有啲就真係唔知點解要參賽。相信唔係因為錢就係名氣。
「製作」
雖然佢哋真係搵到啲好出名嘅歌手上個節目，不過大部分嘅都係內地歌手。有啲真係連佢係邊個都唔知。其實個節目話就話搵五百位觀眾做評判，仲要分唔同年紀層去投票。好似好公平咁，其實做馬都唔係件難事！今次仲離譜到話啲歌手唱到走音要後期加工先出到街同保正節目質素。唔好玩啦，如果陳潔儀都話佢會走音，咁香港啲新人未五音不全？
「觀眾」
每次睇「我是歌手」都會笑咗，唔係笑啲歌手，而係啲觀眾！次次見到個鏡頭影班觀眾嘅時候，又喊又笑仲要扮投入，真係使唔使咁誇張呀？七情上面！況且係觀眾嘅角度又點識分個歌手唱得好唔好。次次要靠搞氣氛，飆高音就會高分。講真啲觀眾識啲乜，憑啲乜嘢去評啲歌星呢？好多唱得好嘅歌手，例如曹格，品冠，黃貫中，林志炫，彭佳慧等等都係有份量嘅歌手！但係偏偏每次都係中國歌手贏，點解？好明顯啦！
