「回帶」
見到好幾個前輩之前寫咗啲關於「社交媒體」嘅文章，搞到我都手痕，所以都想回顧下 2014 嘅「社交媒體」，希望大家見諒見諒。2014 不論香港定國際都發生咗唔同大小嘅事情，係「社交媒體」我最記得五樣嘢！佢哋係「馬航」失蹤，「冰桶挑戰」瘋狂散播，「可口可樂」無限Loop，「UnFriend」言論同「雨傘運動」。對香港人嚟講佢哋嘅「社交媒體」只得 Facebook或者「社群媒體」Whatsapp！頂多加多個 Instagram。但係講嚟講去咪又係 Facebook 嘅產品！
「中毒」
香港人大多數都有嚟個問題，就係「羊群心理」同「慣性動作」。一旦習慣咗，佢哋嘅行為就好難改變，除非佢哋生活上有突變又或者身邊大部份嘅圈子用緊。如果唔係要佢哋試新嘢或者轉會都好難。所以好多外國嘅「社交平台」都無辦法係香港發展。正當「社交媒體」不斷調整信息發佈嘅機制去迎合用戶喜好嘅時候，個個自自然然就會「中毒」。尤其香港人係 Facebook嘅「死粉」！所以如果你「Like」得多，「Comment」得多某一類嘅資訊嘅時候，你好可能已經被洗腦。
「朋友」
嚟兩個字係現今社會嘅解釋好得意！唔通係「Facebook」唔係「Friend」你私底下就唔係「朋友」？就算「Facebook」係「Friend」，唔通私底下就會無端端變咗係「朋友」？講真，「社交媒體」嘅「Friend」有幾多個係你嘅真正「朋友」？係「社交媒體」你可以係「風頭躉」，但實質私底下你可能一個「朋友」都未必有。唔係關係脆弱，而只不過係「實體」同「虛體」嘅分別！大家唔好再將兩者掛鈎啦好唔好？因為朋友係「有血，有肉，有感情」㗎，所以朋友係要見㗎！
