「執錢」
嘩，有錢執？係邊樹？咪就係平安夜，灣仔告士打道囉！真係講都唔信！唔通天降橫財？有乜可能架「解款車」行行吓跌咗幾箱錢都唔知？大啦啦 4500萬喎！真係痴線！最勁嘅就係啲車行緊，無啦啦停係條馬路中心落車執錢。就算警察好快到咗現場，好多都俾人執咗。有目擊嘅人話啲銀紙成吋厚，仲要係 500蚊紙！一疊成50萬！真係變態！
「無腦」
其實啲人係唔係無腦㗎？執到錢仲影相放上 Facebook？咩嘢心態呢？先唔好講執到錢係唔係犯法，正常人都唔會放上網啦！仲以為自己好威！到時俾人拉嘅時候就真係好笑。不過唔係講笑，如果俾你見到咁多錢你又會點？你會唔會執？大啦啦幾十，分分鐘幾百萬跌咗係條路到，唔通唔執咩！點都好，真係好誇張，啲人可以執走成 1500萬！！！勁！
「點解」
其實睇返成件事有好多問題！點解會跌錢？點解啲人知係錢？點解可以停車？點解有旅行團？嚟啲問題就梗係留返俾啲『警察』去查啦，佢哋咁叻！不過大家記得係街到擅自攞走屬於其他人擁有或具有價值嘅財物，可能會觸犯盜竊罪，最高刑罰可達10年。所以唔一定「地上執到寶，問天問地攞唔到」！係你就係你嘅！
