「分別」
嚟個亦都係好多人問我嘅問題。因為你係香港創業，好多人會以為你係為咗賣盤，等收購，等投資，到時就執一筆唔使做。但係我公司係做服務性質嘅工作，賣盤，咁即係賣埋自己俾人？所以我唔係為咗賣盤而去創業。你話我理想派又好，痴線又好，我係想建立一個香港品牌等其它國家知道香港係一個數據分析嘅樞紐。所以先做好自己，做好品牌，質量同客戶行先，而唔係因為潮流去做。
「利弊」
當然要堅持嚟個信念係好難，基本上你嘅資金係得你自己嘅私己錢同賺返嚟嘅錢，因為一但有投資者，你要改變策略嘅速度相對會慢同下下要交數，追數。當然發展速度相對亦會比較慢，樣樣嘢都要好小心。因為有資金就好容易因為發展得太快令管理架構唔穩健，令質量難以保持高水平。所以我情願慢慢嚟，保障咗質素，做好個品牌多個要做好多客。
「取捨」
有時係好矛盾，因為好似有錢唔賺，但係錢係賺唔晒。為咗錢而放棄質量，咁就連品牌都無埋。想信唔係淨係公司資產破產，連誠信都好快破產。有人投資係好事，但係又要孭數，所以又係一個問題。有人想買你，但係賣咗我邊度有收入，就算賺咗筆都食唔過世（當然有啲可以，不過我無咁大想頭）。所以都係個句，先做好自己，最起碼夠食夠住，生活都未得囉！
