「震驚」
正當「雨傘廣場」終於係尋日完全被清場嘅時候，令外一邊係澳洲悉尼竟然遭受幾十年嚟最嚴峻嘅恐怖襲擊。邊個會諗到係 Martin Place 會有一個槍手入咗間咖啡店仲脅持大約30名人質。仲記得以前做嘢日日都會行過，真係諗都無諗過！當個槍手要人質展示寫上伊斯蘭教信仰宣言嘅清真言旗嘅時候，睇到新聞真係有啲驚，因為唔知佢會做乜！仲要話已經係市區內埋咗四枚炸彈。嚟啲先至係真正嘅暴徒！
「無奈」
我以為香港人先會趁熱鬧，點知連啲澳洲人都係咁。。。真係唔明點解啲人係咁危險嘅情況下仲好意思自拍放上網！唔通好威咩？有冇考慮過啲人質家人嘅感受呀？如果個暴徒衝出嚟嘅時候亂槍掃射，啲警察都唔知去救邊個先。真係唔鬼用腦，睇到都好慶！雖然到最後啲警察同槍手對峙咗近16個鐘頭後，警察攻入咖啡店救出所有人質，但係都造成2死3傷嘅慘劇。
「對比」
講真，無諗過連澳洲都發生恐怖襲擊。但係點都好，最少可以見到佢哋處理事件嘅時候點都好過香港政府。雖然最後流血收場，但係大家好一致去救人質，就算傳媒收到槍手電話，知道談判內容，但係佢哋都會聽從政府安排唔去報導。如果俾著香港，我諗一有啲咁爆嘅料第一時間應該已經播咗出嚟。當然今次事件亦反映咗一啲澳洲嘅問題，希望佢哋可以盡快解決。希望兩位死者得以安息，傷者盡快康復！
