「自己」
好多人問我，你收集咗咁多人嘅感受，咁你個篇係邊。其實我一直唔寫係因為我想等我哋嘅目標達到嘅時候先寫。我實在有好多嘢想寫，亦都係過去七十九日寫咗無數咁多嘅文章，影咗無數嘅相，做咗無數次嘅訪問，而我個篇「雨。感受」將會係以「零零零」做編號！如果你有了解「雨。感受」嘅運作，每一編文章係有自己嘅編號！所以我其實自私地留咗嚟個編號俾自己。唔好意思！
「多謝」
係呢度，我真係想多謝所有寫咗感受俾我嘅朋友，無你哋就無「雨。感受」！同時要多謝一班「義工團隊」幫手一齊開檔，睇檔同幫我宣傳「雨。感受」，真係非常多謝你哋無私嘅奉獻，你哋真係好勁呀！我哋一定會再聚，繼續讓「雨。感受」繼續落去！當然，我要多謝幫「雨。感受」一份一份印出嚟嘅朋友，唔係因為你哋大力只持，我哋跟本無辦法印到咁多明信片同其他宣傳嘅物品！多謝你哋！
「承諾」
我應承大家，只要你投稿，我一定會係網上面發報。同時初步諗法係每一百篇就會出一本書俾大家。有投稿嘅朋友，如果我哋出到書嘅話，我想送一本俾你（當然我要搵讚助商）作為一個留諗同感謝你嘅分享！「雨。感受」會繼續俾大家作一個舒發情感嘅平台，會一直開放俾大家，所以就算無咗實體，我哋都會繼續落去。如果之後有任何活動，我一定會通知大家！目標仍然係五百編
