「銅鑼」
雨傘運動嘅開始嘅時候大多數嘅時間都會去銅鑼灣。原因當然係我平時大部份時間都係銅鑼灣出沒。開頭我會去物資站幫手同去派物資俾啲市民，之後就間唔中先落去。銅鑼灣比起金鐘，旺角好唔同，經常被大家冷落。傳媒亦都好少報導，但係我可以講「銅鑼灣」係一個永不放棄，堅守到底嘅地方。無人諗過銅鑼灣係可以留到最後嘅據點，因為人相對少，範圍亦係最細！清場其實話咁易！
「心痛」
點解？因為第一次清場嘅時候我係現場。見到班警察鬼鬼鼠鼠，零晨三四點，當個個市民瞓緊同休息緊嘅時候嚟突襲。返去通知大家起身唔夠幾分鐘，佢哋就殺到嚟！話就話唔係清場，但係個佔領區因為咁少咗四分三。個日好唔開心！因為明明知道佢哋嚟，仲要係最早嗰個，但係冇野做到，眼白白睇住佢一路清。終於知道佢哋有幾卑鄙！
「感動」
好彩銅鑼灣唔多人同比較細，大部份人都忘記咗佢嘅存在，所以終於可以留守到最後！所以就算知道政府好快同好易清場都要堅持去支持大家！見到過去兩日大家都去銅鑼灣支持真係非常感動！大家唔會因為清場就放棄！再次見到好多熟識嘅面孔真係好開心！大家又再次聚埋一齊！不論之後係點，大家一定會留守到最後一刻！希望大家同銅鑼灣共同進退！
