「排隊」
相信香港人好多時都會去食「老麥」，但係大家有冇發覺嚟幾年排個條隊有少少唔同咗。以前你排隊，一個跟一個，去到櫃枱落單，然後收銀員收完錢後就會去攞嘢食同嘢飲返嚟。正！開餐！前果排，你排隊去到櫃枱落單，收銀員十句三四句聽唔明，收完錢佢叫你去旁邊條隊等攞嘢。而家你排隊去到櫃枱落單，收銀員十句七八句聽唔明，仲要講幾百次，收完錢就俾張飛仔你等攞嘢。
「慳錢」
其實大家有無諗過點解咁得意？點解排「老麥」買個餐都搞咁多嘢？其實當你聽完個原因，你就會明晒。如果你做過商務管理，一定知道或聽過 6 Sigma（六標準差）嘅一套商業管理戰略。大多數企業都會通過測量、分析、提高同控制嚟進行改善生產和商業流程。當然「老麥」應該行咗嚟套模式，諗住加快流程，可以慳番啲錢！我唔記得係邊度睇過，而家嚟仲流程好似令「老麥」每張單慳幾秒同大量食材，因為即叫即做！
「嬲爆」
個結果就緊係俾好多人鬧爆！係網上面搵下都有唔少人講。我當然都係忍到嚟一刻，抵唔住頸要寫爆佢。第一，佢之前個模式令好多人唔知排邊條隊。第二，買完又排過，仲要左避右避啲人先安全攞到啲嘢，隨時無得開餐，超混亂！第三，諗住改用飛仔會好啲唔使排多條對，點知仲亂！啲嘢執好咗又唔俾人，個個戇居居企係度等，原全無系統，真係啲嘢食凍晒都未食得。最後，由快餐邊慢餐！等成十幾分鐘都未必有，真係有病！食「老麥」啫。。。都咁難！
