「管理」
唔同行業都雖要「管理」嘅人才。不過就有好多唔同方法或者理論。好多時我都係邊觀察邊學嘢，然後再加入自己個套管理方針。不過時代改變，真係唔可以一本天書睇到老，要不斷改變同離開自己嘅「安全地帶」。好多人都問過我管理團隊嘅問題，大部分時間我都係同佢哋講唔同環境同行業都好唔同。只不過我有一樣嘢一定會做就係八成嘅運作模式係由重基層決定！
「斷層」
返到香港，見到好多公司都好似有一個問題就係「管理層」入面所謂嘅「中層管理」經常出現「斷層」而變成一個「真空期」。其實真係唔知係因為乜嘢原因，但係當我係一間企業做管理嘅時候我會不斷去培養管理層。通常分三層，而最高個層當然係我自己一手包辦。因為要培養人才同知道佢哋嘅長處唔係三兩日嘅事，最起碼要一年以上！所以一開始要付出多啲時間去培養多啲跟你嘅人。
「成果」
如果你嘅團隊有十個員工嘅時候，你要培訓嘅管理層大約要一半，因為你要記住佢哋唔會一世跟住你，隨時會轉工。而且有啲人真係唔鐘意做管理或者未必真係適合做管理，所以一開始要培養多啲。我自己經驗係得返五成係成功。而當你有信心交棒嘅時候，應該已經過咗一年，如果公司或團隊大咗就應該開始再培訓下一層唔好等。不過，今次係你培訓好個班去培訓第二層嘅管理層。咁就可以一代接一代，記住管理層可以係好後生，唔一定要好多經驗！
