「開通」
相信好多人都關注「滬港通」開通嘅情況。望穿秋水，終於等到！等到又點？真係幫到香港經濟？其實又係一個經濟體嘅傾斜嘅項目。開通係唔係對香港好？我真係唔知，但係整個過程好似做騷咁。一時又話「佔中」唔開通，一時又話隻「狼」同中央傾掂數，一時又可以即刻開通。。。真係好好笑！由金融版變咗睇港文版，做到好似隻「狼」搞掂咗件事。。。唉。。。
「利益」
未通之前講到好勁，但係香港國際金融中心嘅地位會唔會就此慢慢消失？好似講到對香港有著數，但係又係益唔到我，咁係唔係得某啲行業先有利益？表面睇又係話雙贏，但真係咩？我覺得係中國嘅策略，慢慢學晒，吸晒我哋嘅資識，然後被遺棄。唔駛回歸 50年就可以清我哋袋。感覺就好似十年前，好多香港人北上搵食，教完佢哋之後變棄卒。加上大量海歸派返嚟，香港人優勢慢慢失去。。。
「事實」
講咗咁耐，呢一兩日都覺得「滬港通」係「南水北調」多個「北水南下」嘅感覺。當然有啲「雷聲大，雨點少」同不斷用唔同借口去解釋個情況。現實係仲需要時間去證明係唔係對香港好定係過香港一棟！不過點都好，同啲基建一樣，對我無幫助，又係益晒啲有錢人之餘仲要有機會影響到我哋香港嘅將來。唔通要學其他人咁為搵食去轉行咩？
