「上京」
一班大學生好勇敢地一心去「北京」希望將香港人嘅聲音反映俾中央政府。講真其實自己有啲擔心佢哋。就算去到，真係唔知返唔返到嚟。去到人哋地頭真係有啲危險，因為佢哋真係咩嘢都做得出！真係「莫需有」，就搞掂你。不過唔去唔通靠香港人政府咩？如果搞得掂就唔使搞到今時今日咁！真係進退兩難！不論點，我哋好似返咗古代要上京搵「皇帝」咁，山高皇帝遠！只希望學生平平安安。
「氣量」
睇到香港警察好大陣仗去送機，真係仲勁過特首同啲韓星！學生出發去北京其實見唔見到中央政府官員係一大問題，不過佢哋如果入到境，至少中央政府有氣量。如果唔係就好似習近平個日同安倍晉三見面一樣，係全世界嘅鏡頭下一副不可一世嘅姿勢去對待日本。如果唔想對話就唔好扮晒嘢啦。不過今次連出登機證都出唔到，所以出境，上機，入境都唔使諗！好明顯再一次「容不下」幾個大學生。
「問題」
真係唔知點解可以「撤銷」個「回鄉證」，佢哋一定又有一個好合理嘅理由，要洗耳拱聽！咁無咗「回鄉證」嘅平民仲係唔係「中國人」？其實係「皇帝」唔想見定係地方政府阻止平民上京參佢一本？無論係點，一個堂堂大國，連平民申訴簡單意願都無辦法嘅時候，真係有怨無路訴。連傾都唔想傾，咁究竟想點？以後政府講任何嘢都唔會說服到任何人了。「有商有量」喎！你信佢一成都死！
