「收錢」
過去兩日係金鐘派發「雨。感受」，期間不斷有人問，係唔係要俾錢買㗎？邊個出錢俾你整㗎？要錢㗎？唔通啲人真係仲唔信係市民自發去支持整件事？真係有人派錢俾我哋？點解下下仲講錢呢？唔係樣樣嘢都要錢先買到。大家都係盡一份心意去做自己覺得該做的！有啲朋友仲話幫手出錢加印啲卡俾大家，咁唔通又有人俾錢佢？
「學生」
最好笑嘅係除咗錢之外，好多人走埋嚟問我係唔係學生。乜我似咩？大部份問我嘅都係上咗年紀，亦有少部份係中年人士，我諗佢哋係覺得出得嚟個班一定只得學生。其實我見到好多唔係學生嘅市民係度幫手，有啲仲好好心咁派物資俾我哋。
「心態」
雖然每個人出嚟嘅心態唔同，但係有一個心態好肯定係有啲人落去嘅原因。嚟個就係貪小便宜。見到好多自發嘅人整嘢，派嘢，大部份人一聽到唔使錢就排咗先。連做乜都咪知就排隊，慌死會執輸。無可厚非，嚟個係香港人其中嘅一個特質，但係唔可唔可以諗諗點嘅啲人會免費整嘢同派嘢嚟？
