無助感


個人分享
Tagged With: , , , , , , , , ,

當你無助嘅時候會點?有時真係有太多問題需要解決,只係無論你幾努力都好,問題不斷重複。有時真係好攰,究竟幾時先至可以安定落嚟。當然有時會問自己究竟為咗啲乜嘢要搞到咁辛苦。如果當日無做咁嘅決定,今日又會唔會有咁嘅問題出現?當然好多嘢無得返轉頭,而當日做嘅決定亦都係基於當時嘅狀況。或者自己太過樂觀,有或者無諗過環境可以變得咁快?而因為當日一個既決定,真係虧欠太多人。

串起嚟

做數據分析通常第一件事就係發現會有好多唔同嘅數據係唔同嘅部門,唔同嘅格式,同唔同嘅數據庫。而大家嘅關連性係可有可無,只係有無一條鎖匙可以將原本無關連性嘅資料串連起嚟。咁就可以將比較單面嘅訊息立體化。當然要全面了解客戶行為係冇可能嘅事,但係最起碼將客戶已經提供嘅資料整合,之後就有機會搵到一啲新嘅資訊幫到自己嘅業務。

爸爸節

做咗爸爸嚟個角色接近五年,當然一個小朋友同兩個小朋友嘅分別其實都幾大,真心佩服身邊啲朋友有三個甚至乎四個小朋友。有時都會諗其實係佢哋心目中究竟我係一個點樣嘅爸爸,自問未必係一個最好嘅爸爸,有時真係想陪佢哋多啲,同佢哋玩多啲。雖然話今年有疫情,但係其實上半年係少咗時間陪佢哋。有朝忙到晚,有時淨係想攪掂晒所有嘢可以做返自己嘢。

要落地


個人分享
Tagged With: , , , , , , , , ,

好多時大家覺得好容易嘅嘢,其實對於大部分嘅人嚟講原來係好複雜同好難明。莫講話搞網店做生意,就算連點樣註冊域名同開個公司電郵,十分鐘嘅嘢就已經可以考起好多人。所以要將好技術嘅嘢簡單化,要用平民百姓都聽得明嘅語言去教人點樣開網店,甚至乎用數據去了解客戶同投放廣告,其實真係一啲都唔容易。要落地首先要將複雜同技術術語平民化,如果唔係真係雞同鴨講。

十年的

十年前決定放棄高薪厚職,開始籌備自己公司,用六個月一邊返工一邊準備,希望用十年做自己想做嘅嘢。十年後嘅今日,覺得十年原來比想像中快,快到自己都唔知做咗啲乜,甚至乎覺得比起十年前更加倒退。近嚟五年嘅轉變就更加大,尤其係郭大少出世之後。如果再比我揀過會唔會揀同一條路?十年期限到了,下一步究竟係點?其實近年嘅問題不斷重複,真係有啲攰。放棄,堅持依然係一大個問號。

 
  • 告別了人到咗某啲年紀就要經歷生離死別,雖然明白嚟個道理,人總會離開呢個世界。當然人老去係自然定律,不過當你身邊有相約年紀嘅朋友離開嘅時候,自自然然又會反思究竟人其實係幾咁脆弱。係唔係真係去到失去先至去回憶,去珍惜係自己人生出現過嘅每一個人。係唔係將所有嘢變得太過理所當然?相信大家總有機會再見,相信人生仍然有大把時間,但係到最後其實再無咁嘅機會。淨落嚟嘅只係腦入面嘅回憶同畫面。
  • 五十九我諗今個月最開心嘅就係迪士尼開返!因為又可以唔駛諗同佢去邊放電。當然依家要預早七日訂位,不過好彩係佢開返嘅第一個星期六已經可以去到。真係整整五個月無去過,而感覺好似第一次去咁見到啲新嘢都會話嚟啲之前無㗎喎!除此之外,今個月真係唔記得去咗幾多次海灘,真係一好天同有時間都會去,因為真係唔知同佢可以做乜。之前諗住佢大個咗可以試過去行街,但係到最後都係搵自己嚟搞。有話攰,又話悶,真係激死!
  • 本地化過去十幾二十年,好多行業都會將業務全球化,將好多工作都外判俾其他公司同國家去處理。當然目的係控制成本同營運風險!不過因為今次嘅疫情令好多公司再一次研究全球化嘅利與弊。對於資訊科技相關嘅業務其實相對影響比較少,因為只要網絡仍然運作正常,基本上工作依然可以係屋企做。當然如果連網絡都受到影響嘅話,咁就真係乜都冇得做啦。
  • 為什麼人類其實係好自私!當然或者你同我都唔覺,事關大家都會覺得所有嘢都係理所當然。只不過我哋每一日嘅日常生活都係取自地球嘅資源,而且有啲資源係會有用完嘅一日。雖然現今科技發達,但係好多生物都面臨絕種!原因係因為我哋人類不斷令到好多野生動物無辦法正常生活。而當大家認為嗰啲動物威脅自己嘅時候就選擇去奪取佢哋嘅生命!其實佢哋做錯咗啲乜呢?