一七年


個人分享
Tagged With: , , , , , , , , ,

二零一七應該係我人生入面最差嘅一年!由頭到尾其實都唔知今年做咗啲乜,只係知道每一日都有唔同嘅問題要處理!真係可以話十個煲得一個蓋去形容。本來以為年尾可以好過返少少,點知到最後仍然仲未有啲乜嘢突破!雖然每日都希望用一個正面嘅心態去看待困難同逆境,但係每日得到嘅係無數嘅批評同責備。雖然嚟到今年嘅最後一日,情況依然未有改善,只係希望新嘅一年做返自己!

雪中炭


個人分享
Tagged With: , , , , , , , , ,

每個人一生都會遇到唔同嘅困境,但係當你有事嘅時候邊個會嚟幫你?當然無人有責任一定要幫你,好多時都會好客氣咁同你講幫唔到你。有時要開聲去搵人幫手唔係一件易事,人哋幫唔幫你係佢哋嘅個人選擇。但當有朋友會出手相救嘅時候你就會覺得佢哋雪中送炭,求你一命。嚟啲朋友真係兩脇插刀,真係多謝佢哋係無助嘅時候出手扶你一把。除咗感激之外真係唔知講乜嘢好。

抗逆境


個人分享
Tagged With: , , , , , , , , ,

人生就一定有順境同逆境嘅時候,而順境真係要做好逆境嘅準備。所有人都唔希望處理逆境,因為問題真係多到你唔信,有時甚至乎唔知點樣去處理!逆境嘅日子係好難過,但係過咗就慢慢回覆正軌,而好多嘅負面情緒就自自然然會消失。有時最慘嘅係唔知點開口同人講自己嘅問題,因為通常都唔會明。有時就算佢哋聽完其實都無幫助,事關佢哋都幫唔到啲乜!

睇心態


個人分享
Tagged With: , , , , , , , , ,

「心態」

做人做事其實都係好睇自己嘅心態,無論你係打工又好,自己創業又好,心態係主宰你嘅成功與否。當然人身有好多起起跌跌,而大家一定會遇到唔同嘅難關。如果你用正確嘅心態去處理逆境,其實好多都會變得簡單容易去處理,就算天跌落嚟真係可以當被冚。好多時啲人淨係係度怨天尤人,但係其實係唔係本身心態嘅問題?逆來順受,其實真係唔係個個可以做到!

生無常


個人分享
Tagged With: , , , , , , , , ,

「人生」

好多時我哋都會講人生無常,但係幾多人真係明白固中嘅意思?人生本身就係來也匆匆去也匆匆,何必執著一啲虛無飄渺嘅嘢呢?如果你無經歷過大起大跌,無去體驗其他地方嘅風土人情,其實講真係幾難明箇中道理。而當你明白嘅時候又可能已經泥足深陷,無法自拔,或者甚至乎去到人生嘅盡頭。所以話凡事睇開啲,人都精神啲。活在當下,珍惜眼前嘅一切。

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。