相信依家好多人去旅行都唔可以唔上網，但係應該唔會有人會俾得起咁昂貴嘅漫遊數據費，所以通常都會租一隻蛋去旅行方便上網。只不過有時幾個人去旅行，如果得一隻蛋嘅話，只要離開咗個接收範圍，基本上就無辦法上網。因此好多人而家就會預先買定一啲數據電話卡，但係啲電話卡真係五花八門，花多眼亂。究竟點樣揀都真係需要小小時間去了解。

不經不覺離開咗大公司已經八年，正所謂人走茶涼！如果今日仲記得你嘅話，其實你應該感到安慰。當然我唔知仲有幾多人會仲記得我嚟個上司，或者係佢哋心目中都只不過係一個分配工作比佢哋嘅人而已。有時自己真係幾懷念當時嘅團隊，相信依家好難再建立返一個咁有嘅質素嘅團隊。我只可以話我幸運遇到每一位同我齊上齊落，完全信任我嘅團隊！無佢哋就無今日嘅我！

要講香港茶餐廳文化當然唔會少得絲襪奶茶！其實奶茶同蛋撻一樣都係源自英國嘅下午茶，但係傳統嘅英式奶茶係以紅茶為基礎，只用少量牛奶，不用鮮奶油，有時會加入食糖。而港式奶茶點解由叫做絲襪奶茶，其實原因係因為用嚟過濾奶茶嘅棉紗網經奶茶浸泡後，顏色同樣貌就好似絲襪咁嘅樣！但係點解要用棉紗茶袋濾過啲奶茶？原因係令到奶茶比較細滑，同時茶味更加均勻。

係商業環境，開源節流係好平常嘅事。當然裁員係節流嘅常用手法！通常都係將一啲高人工，高年資，低價值嘅職位嚟開刀。而好多時資訊科技嘅部門都被視為高開支嘅部門，但係好多管理層其實忘記咗今時今日好多同營運有關嘅事務都係同科技有關。要提高工作效率，節省資源，其實都要靠科技。但係點解將自己嘅資訊科技嘅員工開除，之後再搵出面嘅公司承包？咁樣真係慳到錢？

老實講真係好耐無睇港產片，最近最想睇嘅應該係「一念無明」。不過除此之外，今年被提名嘅電影真係有好多都聽都未聽過！或者近年真係睇少咗戲，所以真係無乜留意究竟有啲乜嘢嘅港產片。另外其實都有小小怕睇嗰啲合拍嘅電影，因為套戲有非本地嘅演員，啲對白好多時都要搵配音將佢變返做廣東話。其實感覺真係好怪，所以如果唔係啲超級好評嘅電影都好少會入場睇。