速成班

過去幾個月都係比較專注係開班教分析數據嘅業務,當然係因為之前有好多人都問我邊度有堂上。雖然已經行咗一排,不過係唔同嘅地方都見到有其他公司都有開唔同類型嘅課程,有時亦都會諗大家嘅定位有啲乜嘢唔同。我相信最大嘅分別係宣傳手法同課程嘅價錢定位,而好多時見到佢哋最常用嘅字就係速成!咁明白嘅,因為香港人忙所以樣樣嘢就當然希望學完就用得,只係現實同希望係兩回事!

開完班

要做兩日嘅課程真係唔容易,尤其係內容安排同要照顧每位嚟上堂嘅期望。而今次係第一次完完整整,由頭到尾咁講完數據分析嘅流程,每一環會做嘅嘢,其實真係第一次。當然更加重要嘅係嚟上堂嘅朋友要同公司申請兩日嚟,真係感激!過去嗰幾日真係為咗整理教材真係無乜點瞓,對精神需求真係好大。希望如果下次再搞嚟個課程會做得更好,如有不足,多多包涵!

開班啦

「課程」

今年其中一個好想做嘅嘢就係搞數據分析嘅課程。點解?因為覺得香港好似仲未有一啲針對數據分析嘅課程,所有嘢都係散修修,無一個系統性嘅學習課程。其實由年頭講到而家都已經半年,但係都未係好認真咁去搞。因為真係有少少摸著石頭過河。雖然有好多嘢都未係準備得好好,不過都想一步步咁去實行。最起碼咗個頭先啦!

做培訓

「培訓」

過去幾年,我都話香港嘅數據分析一直比其他亞洲國家落後,雖然透過唔同嘅渠道推廣數據分析,但係效果唔係好顯著。好多時都會有人無啦啦搵我問關於數據分析嘅問題,尤其係問我邊度有堂上。講真香港真係冇乜,就算有教嗰個都唔知佢係邊個。最少我相信我認識大部份已經從事數據分析工作嘅人。最慘係有時有啲一知半解嘅人出去教,點知好多嘢都係錯誤詮釋同表達。

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。