返札幌

去到富良野嘅最後一日,玩完之後就開始要回程返去札幌市。嚟幾日真係熱到傻咗同晒到燶咗!不過都係一件好事,因為如果陰天嘅話就好難影到靚相!希望將來有機會再嚟嚟個地方。如果你問我嘅話,我都真係比較鍾意去啲郊外地方。或者我唔係鍾意行街買嘢嘅人,所以去到啲鄉郊小鎮反而仲覺得舒服。如果退休之後可以係嚟啲咁靚,咁休閒嘅地方生活就好啦!

富良野

去到富良野間民宿,郭大少就超級興奮。一入門口就無啦啦好興奮咁大嗌,嚇到個伯伯彈起。之後去到民宿間房又無啦啦見到張床就二話不說咁大字型咁跳咗上去!每次去到一間新嘅民宿佢都好興奮,好似返咗自己屋企一樣!不過真係要講一講間民宿,話說係十幾年前,楊千嬅同古天樂係嗰度拍過戲,而睇返資料應該係乾柴烈火。食早餐嘅時候,屋主仲好熱情咁同我哋講套戲係佢間民宿到拍!

北海道

去日本咁多次都係同老婆一齊去,之前郭大少未出世嘅時候就去咗冲繩,老婆陀住佢嘅時候就去咗東京同富士山,之後佢出咗世就去咗次冲繩,九州。而同嚟位小朋友去旅行基本上要去一啲可以自駕遊嘅地方,因為最起碼佢玩完信瞓覺都可以係車入面瞓。當然而家去旅行比起之前佢細個嘅時候好好多,最起碼帶嘅嘢少咗,而每次佢都覺得啲嘢好新奇,樣樣嘢都好似好好玩咁。

 
  • 數據先好多公司都會有唔同嘅數據,但係到最後仍然解答唔到一啲商業上嘅問題。原因其實唔係出於數據,而係無人去設計點樣收集數據。就算有數據都唔知啲數係啲乜嘢情況下收集返嚟。最終導致啲數據無法解釋日常業務嘅問題!可多公司都低估咗收集同分析數據所需要嘅人力以及資源,通常都係到咗分析嗰一刻先至發現問題。所以點樣收集數據係緊要過點樣分析數據!
  • 被截停當然警察如果遇到或者發現可疑嘅車輛係有權利去截停佢,但係只不過如果因為要截停可疑嘅車輛所導致嘅傷亡係唔係有必要呢?其實係好幾年前香港警察曾經截停路面嘅私家車做路障,希望截停可疑車輛而導致安份守己嘅市民有性命財產嘅損失。而近日亦有類似「人肉路障」嘅事件發生,今次就導致兩死五人受傷。老實講點解要市民用自己嘅性命同財產去幫你截停可疑車輛先?
  • 搭巴士香港人好依靠公共交通工具,尤其係巴士。有時揸車嘅時候真係會遇到一啲罔顧乘客安全嘅巴士司機。近年真係發生咗唔少嘅巴士意外,有啲都幾嚴重。作為一間巴士嘅營運商,聘請巴士司機嘅時候應該係要非常嚴謹,除咗要有定期嘅評核之外當然亦要給予足夠嘅培訓比車長。講到尾,一架載滿人嘅雙層巴士有一百人以上,如果出現意外嘅話係會造成嚴重嘅傷亡!
  • 大風雪雖然以前住大連嘅時候,冬天落雪係好正常,不過真係好多年無去過落雪嘅地方。一般落雪嘅地方都會有暖氣,所以其實係室內都唔會太凍。不過一出去就會凍到變雪條!最記得有一次去芬蘭工作,因為大風雪搞到班飛機遲咗一個鐘頭先至降落,一落機先知到真係好誇張,應該係咁多年遇到嘅最大風雪。不過落雪真係好靚,白濛濛一片真係好舒服!