新零售

乜嘢叫做新零售?其實簡單嚟講只不過係想網上零售同實體零售結合一齊,而當中所包括嘅人力資源,貨品,倉庫,物流等等。當然電子商務係未來嘅發展空間仍然會非常之快,而現時好多發展得快嘅行業例如旅遊相關嘅係主導,因為客戶最終所購買嘅產品同服務都有一個特定嘅標準。只不過有好多行業仍然有好大嘅發展空間,而實體店提供一個平台俾客戶去感受同了解產品嘅功能同質素。

網上行

依家要做網上營銷真係好複雜,因為實在太多嘢要兼顧,最大嘅分別就係日新月異嘅科技發展。當然仍然有好多公司仲需要轉型,不過要成功轉型實在唔係一件易事。最大嘅問題係在於心態。如果用傳統營銷嘅心態,其實係無可能轉型。而唔敢嘗試,唔肯改變,唔肯接受,都係常見嘅致命傷!要理解網上營銷係需要時間,只不過好多理論其實同傳統營銷係無分別。

自己揀

當然自己唔係第一次做訪問,而大部份嘅訪問都係雜誌為主,當中其實仲有一啲甚至乎係做完訪問之後從來無出街!一般搵我都係講有關數據分析相關嘅嘢,而琴晚就真係第一次做網上直播嘅訪問,感覺真係幾新鮮。所以真係好多謝嚟位朋友搵我!因為之前一個網台嘅節目而認識嚟位朋友,之後佢亦都邀請過我去幫手做網上電台嘅主持。但係自己知道當時無時間去做好件事,所以就好無奈地咁推咗佢嘅邀請。

睇王菲

相信好多人都會認識樂壇天后王菲,當然我個年代佢真係用佢嘅藝名王靖雯。雖然佢無乜參與電視劇,但係依個大家睇過原振俠嘅話就應該記得佢係有份參與。如果你有玩開最終幻想嘅話,一定知道王菲曾經為第八集唱過主題曲。依家莫講話係好多場合都唔會見到佢嘅蹤影,甚至乎要聽到佢唱歌都好難。慶幸前幾年佢係香港開演唱會嘅時候有機會再一次聽到佢嘅歌聲,因為佢嘅演唱會飛真係一票難求!

旅遊業


個人分享
Tagged With: , , , , , , , , ,

以前係中國做嘢其實好多時訂機票酒店都係靠攜程,但係返到嚟香港就唔知點解自自然然就會去咗旅行社訂機票酒店。或者香港人真係被服務慣,所以搵個人去安排行程點都好過自己浪費時間去唔同網站格價同搵機票酒店。當然依家香港好多人都已經會上網買機票同訂酒店,但係相比起外國仲係相對比較少。不過香港嘅旅行社都要盡快轉型,如果唔係好易被網上嘅平台慢慢侵蝕個市場。

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁!
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你!
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友!
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。