簡單化

要令大家簡單明白數據分析係啲乜嘢其實係一件比較難嘅事。因為要配合好多方面嘅嘢先至可以發揮到數據嘅真正價值。諗咗好耐其實都未諗到點樣先至可以簡單咁解釋一啲咁複雜嘅嘢。數據真係一樣好虛無縹緲嘅嘢,經常講數據唔係一樣實體嘅嘢,但係偏偏係一樣每個人每日都會接觸到嘅嘢。就算你有數據都好,係唔係有用係一個問題,因為數據係一個因果嘅關係。

使用者


個人分享
Tagged With: , , , , , , , , ,

可能你聽過使用者經驗,但係有幾多人了解使用者經驗?其實每個人都會接觸到,只係大家覺得有啲嘢係理所當然。例如你去一間餐廳,入去嘅時候有無侍應招待你,間餐廳嘅環境如何,侍應嘅服務態度,嘢食嘅品質等等,每一環都會影響使用者嘅體驗。好多人其實將使用者經驗專注係某一個特定嘅範圍,但係往往就忽略咗其他地方嘅體驗。所以一個好嘅使用者經驗係會顧及整個使用嘅過程。

無諗過


個人分享
Tagged With: , , , , , , , , ,

其實有好多日常問題都會有唔同嘅解決辦法。當然科技係其中一樣可以令好多嘢方便咗,就例如以前去睇戲要去到戲院先知有無位,買嘢要行好多地方先知道邊間最平,去食飯唔知間餐廳好唔好食,揸車去停車場唔知有無位,等等。其實嚟啲都係日常生活嘅問題,而現今嘅科技係可以解決甚至乎已經解決咗嘅問題。有時唔係一啲突破性嘅嘢,只要改善到日常生活,自自然然就會有人用!

再唸過


個人分享
Tagged With: , , , , , , , , ,

其實做任何生意都係講緊供與求嘅問題。只要有市場需求先至有得做,至於市場嘅需求有幾大,有幾多競爭對手,等等嘅問題其實係主宰一間公司嘅方向。好多時或者有啲嘢諗得太過簡單,只不過如果簡單複雜化嘅話,諗得太多可能機會已經過去咗。所以好多時好多嘢都係邊做邊學,摸著石頭過河。當然會有跣腳嘅時候,但係要成功過河嘅話,好多時要折返再諗過一個新嘅方法過河先至得。

為乜嘢


個人分享
Tagged With: , , , , , , , , ,

好多時都會問自己搞咁多嘢為乜,真係自己搵自己嚟搞。點解唔舒舒服服咁過每一日,而係日日不斷諗點樣解決問題。好多時一波未平,一波又起,真係十個煲得九個蓋。有時真係想抖啖氣,靜一靜諗清楚下一步點做嘅時間都無。真係咁辛苦為咗啲乜嘢呢?好多年都無咁嘅感覺,真係到咗一個位想放低晒所有嘢重新嚟過。不過當然講就易,而現實邊會有咁嘅可能。

 
  • 數據先好多公司都會有唔同嘅數據,但係到最後仍然解答唔到一啲商業上嘅問題。原因其實唔係出於數據,而係無人去設計點樣收集數據。就算有數據都唔知啲數係啲乜嘢情況下收集返嚟。最終導致啲數據無法解釋日常業務嘅問題!可多公司都低估咗收集同分析數據所需要嘅人力以及資源,通常都係到咗分析嗰一刻先至發現問題。所以點樣收集數據係緊要過點樣分析數據!
  • 被截停當然警察如果遇到或者發現可疑嘅車輛係有權利去截停佢,但係只不過如果因為要截停可疑嘅車輛所導致嘅傷亡係唔係有必要呢?其實係好幾年前香港警察曾經截停路面嘅私家車做路障,希望截停可疑車輛而導致安份守己嘅市民有性命財產嘅損失。而近日亦有類似「人肉路障」嘅事件發生,今次就導致兩死五人受傷。老實講點解要市民用自己嘅性命同財產去幫你截停可疑車輛先?
  • 搭巴士香港人好依靠公共交通工具,尤其係巴士。有時揸車嘅時候真係會遇到一啲罔顧乘客安全嘅巴士司機。近年真係發生咗唔少嘅巴士意外,有啲都幾嚴重。作為一間巴士嘅營運商,聘請巴士司機嘅時候應該係要非常嚴謹,除咗要有定期嘅評核之外當然亦要給予足夠嘅培訓比車長。講到尾,一架載滿人嘅雙層巴士有一百人以上,如果出現意外嘅話係會造成嚴重嘅傷亡!
  • 大風雪雖然以前住大連嘅時候,冬天落雪係好正常,不過真係好多年無去過落雪嘅地方。一般落雪嘅地方都會有暖氣,所以其實係室內都唔會太凍。不過一出去就會凍到變雪條!最記得有一次去芬蘭工作,因為大風雪搞到班飛機遲咗一個鐘頭先至降落,一落機先知到真係好誇張,應該係咁多年遇到嘅最大風雪。不過落雪真係好靚,白濛濛一片真係好舒服!