三歲了

眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友!

兩歲半


個人分享
Tagged With: , , , , , , , , ,

唔經唔覺由港島東搬咗嚟新界西兩年,當初都係希望郭大少有多啲地方走動同空氣會好啲。雖然從來未住過九龍同新界,而家就慢慢習慣咗。不過又開始諗郭大少讀書嘅嘢,所以又係時候諗下係唔係要搬去第二度。今時今日係香港讀書真係慘,但係無辦法個遊戲規則就係咁,如果政府同學校一日都唔改,最後唔係辛苦我哋嘅下一代,而係連父母都辛苦埋一份!

廿七個


個人分享
Tagged With: , , , , , , , , ,

話咁快又一個月,點解好似啱啱琴日先至寫完回顧今日又寫?或者每日同郭大少返學放學嘅日子就係咁,唔覺唔覺又一日,感覺今個月過得仲快咗。有時見到佢啲古靈精怪嘅樣就會諗起自己細個,真係好似唔似,不過就真係好搞笑。而家成日當自己好大個,樣樣都想自己嚟,但係做唔到又發自己脾氣,真係俾佢激鬼死。老實講,郭大少可唔可以大得慢少少呢?

買唔到


個人分享
Tagged With: , , , , , , , , ,

係嚟個世界上有好多嘢係用錢買都買唔到!就好似時間咁樣,一分一秒咁樣過,無得返轉頭。當然好多人都會話要善用時間,想每分每秒都用得其所,因為人生話長唔長,話短唔短,應該用最短嘅時間做最多嘅嘢。以前或者想一日有四十八小時,因為啲嘢做極都做唔完。但係人大咗,而家就希望時間唔好過得咁快,因為唔想郭大少大得咁快。但係點都好時間係買唔到。

兩歲啦


個人分享
Tagged With: , , , , , , , , ,

兩年前嘅今日有一位小朋友嚟到嚟個世界。從此我嘅人生再不一樣,我嘅生活都因為你嘅出現而改變咗好多。不經不覺做咗你爸爸兩年,唔知係你眼中我嚟個爸爸係點呢?雖然你開始踏入茶煲嘅階段,但係可以睇住你成長已經係一件好幸福嘅事,因為幸福唔係必然。我只係得一個好簡單嘅要求,就係你有一個開心快樂嘅童年!希望你長大之後會有機會睇返今日我寫嘅嘢啦!

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。