越希望


個人分享
Tagged With: , , , , , , , , ,

每個人都希望自己可以成功去達到自己嘅目標。只不過世事往往都係會同你背道而馳!有時成功都只係要睇彩數,係你就係你,唔係你就唔係你。當然好多人會話你唔努力,唔堅持,所以先至唔成功。但係嗰啲人又真係知道你付出過幾多咩?就算講佢哋都唔會明,因為係佢哋眼中只有成功與否。到最後要面對嘅亦都只有自己,跌低起返身亦都係要自己,過程中有幾唔開心又有邊個知?

年尾了

今年見到好多人回顧二零一六年都話今年好多嘢都唔係太好。當然我都有同感,因為生活同工作嘅各方面都唔係太如意。點都好,今日係今年嘅最後一日,所以都係要為今年作一個總結。今年年頭搬咗屋,一家人換咗一個新環境,每日大家嘅焦點都係郭大少。今年同郭大少去咗三次旅行,分別去咗沖繩,蘇梅,同九州。而今年大部份嘅時間其實都係放咗係佢度,因為希望可以同佢一齊成長!

講理念

「理念」

係工作上面,有時真係睇下你好唔好彩,因為要遇到同你理念一樣嘅人其實真係十分之少。而如果你所管理嘅團隊同你嘅理念唔一樣嘅話,有時真係會幾吃力。其實理念係啲乜嘢?簡單嚟講其實係一個願景或者一個共同嘅使命標!當然人嘅目標同理念通常都係相輔相成,而且亦都會隨著時間而改變。但係如果經常改變理念就會令人覺得模糊同無可適從!

路不同

「創業」

係創業路上要搵到一個合適嘅拍檔其實真係好難,要有相同嘅理念,要並肩作戰,衰啲講句同搵老婆無分別,甚至乎比起搵老婆嘅條件仲要苛刻!好可惜暫時我只係搵到一個老婆而唔係一個拍檔。所以好多時真係睇緣份,事關唔係個個人都會搵到一個拍檔可以同你同甘共苦,一切拼搏。如果你有一個咁嘅拍檔,有一個咁嘅團隊,咁真係恭喜你!

錯方向

「數據」

過去嗰七年,見到好多公司都開始慢慢接觸數據,雖然仲未可以話佢哋有一個好明確嘅目標,但係最起碼佢哋係度嘗試點樣去運用。只不過大部份嘅公司都係錯方向,仲未真係睇通如何運用數據。簡單嚟講要打通任督二脈唔係一件易事,因為要經過好幾個階段先至可以發揮到數據嘅價值。如果只係因為要交功課嘅話,真係無乜意義!

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。