講原則

「原則」

每個人都應該有自己嘅一套原則同一條底線。而做生意都係一樣,如果唔係其實真係冇乜意思。香港嘅社會就係咁,以為比少少錢就可以用人用到盡!有時仲聲大大講,而家俾生意你都唔做!對唔住,我唔係扮清高,只不過係我有我嘅原則,唔係因為錢多與少嘅問題,而係態度嘅問題。我唔怕你貨比三家,因為真係真金不怕紅爐火!

講理念

「理念」

係工作上面,有時真係睇下你好唔好彩,因為要遇到同你理念一樣嘅人其實真係十分之少。而如果你所管理嘅團隊同你嘅理念唔一樣嘅話,有時真係會幾吃力。其實理念係啲乜嘢?簡單嚟講其實係一個願景或者一個共同嘅使命標!當然人嘅目標同理念通常都係相輔相成,而且亦都會隨著時間而改變。但係如果經常改變理念就會令人覺得模糊同無可適從!

有志者

「志願」

人嘅志願會隨著年紀而改變,當然包括我在內。仲好記得以前細個搭校車返學同放學都會經過消防局,所以細個嘅時候想做一個消防員。到咗中學其實一直想做建築設計師,但係覺得要讀五年先至有個學位所以之後變咗做平面設計。但係因為時間同環境改變,依家自己做緊嘅嘢基本上已經完全同以前嘅志願無關。不過我依然有一個志願,就係希望更多人認識數據分析嚟個行業!

路不同

「創業」

係創業路上要搵到一個合適嘅拍檔其實真係好難,要有相同嘅理念,要並肩作戰,衰啲講句同搵老婆無分別,甚至乎比起搵老婆嘅條件仲要苛刻!好可惜暫時我只係搵到一個老婆而唔係一個拍檔。所以好多時真係睇緣份,事關唔係個個人都會搵到一個拍檔可以同你同甘共苦,一切拼搏。如果你有一個咁嘅拍檔,有一個咁嘅團隊,咁真係恭喜你!

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。