漫畫書


個人分享
Tagged With: , , , , , , , , ,

細個嘅時候好多時都係睇卡通片,但係就唔知原來卡通片其實好多時都係因為有漫畫先。香港真係少咗好多淨係賣漫畫嘅商店,而最近期睇過嘅漫畫應該係進擊的巨人。當然唔同人有唔同嘅喜好,有啲鍾意睇美國嘅漫畫,有啲就鍾意睇日本嘅,當然仲有香港本地嘅漫畫啦!好多時漫畫都係虛構出嚟,不過有時亦都有啲係反映當時嘅社會文化,就好似大家熟悉嘅老夫子。

動數據

依家真係乜嘢都講數據,就連漫畫入面嘅情節都變成數據,真係唔俾個服字都唔得。前幾日大家都應該有可能睇到一條短片關於「足球小將」漫畫入面嘅各種數據!老實講大數據就真係稱唔上,事關所謂嘅大數據嘅五大特點一點都無,因為其實佢哋係講緊九十二本漫畫入面嘅內容。不過要係漫畫入面咁多嘅細節,再整理資料,其實係需要一定嘅時間。所以都真係要俾個讚佢!

老夫子

相信好多人都會有睇漫畫嘅習慣,當然本地嘅漫畫家唔多,大部份嘅人都會睇日本漫畫為主。而係香港最為人熟悉嘅漫畫就應該係《老夫子》!唔知有幾多年輕人有睇過《老夫子》嚟本漫畫,就算而家睇番都會覺得好好笑。其實《老夫子》陪伴咗好多香港人成長,不論男女老幼都唔會唔記得入面嘅人物:老夫子,大番薯,秦先生,陳小姐等。唔知大家屋企仲有冇《老夫子》嘅漫畫呢?

聖鬥士

我相信好多八十後都會記得「聖鬥士星矢」嚟套漫畫,因為係我哋嘅集體回憶。最記得嘅就係每一個人嘅必殺技同一件件好靚嘅聖衣!不論係銀河爭霸篇,黃道十二宮篇,海王篇,冥王篇,天界篇,等等,大家都會俾每一件聖衣所吸引。細個嘅時候我相信好多人都希望自己都會有一件聖衣。而如果俾你揀,你會揀邊一件同最鐘意邊個角色呢?

唔係呀

「漫畫」

係漫畫世界入面大部份嘅嘢都係虛構出嚟,但係點解咁多人咁鍾意睇漫畫?我諗每個人都有唔同嘅睇法!有啲人睇故事,有啲人睇畫功,有啲人睇作者,真係問十個人都會有唔同嘅答案。但係每個漫畫嘅角色都會有預設嘅立場,而當故事發展到唔同嘅階段,作者都希望有啲新嘅衝擊。只不過係唔係每個讀者都鍾意嚟啲改動就真係見仁見智喇!

 
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。
  • 放閃日其實放閃係一個網絡嘅用語,主要係用嚟形容啲人係網上面炫耀自己。當中用得最多嘅係情侶之間互相公開自己嘅幸福同快樂,尤其係一啲單身人士搵到伴侶之後不斷發放相片炫耀自己嘅幸福。好多人會用閃光彈嚟形容,而回覆嘅通常係帶上黑超嘅表情符號,因為閃光彈好刺眼,所以要帶返副黑超擋一下啲耀眼嘅光芒!所以每逢情人節好多人都會通過唔同嘅渠道放閃!
  • 數據先好多公司都會有唔同嘅數據,但係到最後仍然解答唔到一啲商業上嘅問題。原因其實唔係出於數據,而係無人去設計點樣收集數據。就算有數據都唔知啲數係啲乜嘢情況下收集返嚟。最終導致啲數據無法解釋日常業務嘅問題!可多公司都低估咗收集同分析數據所需要嘅人力以及資源,通常都係到咗分析嗰一刻先至發現問題。所以點樣收集數據係緊要過點樣分析數據!
  • 被截停當然警察如果遇到或者發現可疑嘅車輛係有權利去截停佢,但係只不過如果因為要截停可疑嘅車輛所導致嘅傷亡係唔係有必要呢?其實係好幾年前香港警察曾經截停路面嘅私家車做路障,希望截停可疑車輛而導致安份守己嘅市民有性命財產嘅損失。而近日亦有類似「人肉路障」嘅事件發生,今次就導致兩死五人受傷。老實講點解要市民用自己嘅性命同財產去幫你截停可疑車輛先?