牛肉乾


個人分享
Tagged With: , , , , , , , , ,

好多人會問點解告票係香港被稱爲牛肉乾呢?其實係有原因嘅,因為係八十年代之前,一張交通違例嘅罰款告票係一式三份嘅。因為執法人員要好似罰抄咁抄三次,因此會增加抄錯牌嘅機會。所以告票入面會有一層類似過底紙嘅黑色物體。當執法人員抄完牌之後,張告票就會連埋張過底紙一齊夾係擋風玻璃嘅水撥上面。當時印刷技術比較求其,所以遠睇嘅時候就好似一塊牛肉乾咁,所以就因此得名!

停車場


個人分享
Tagged With: , , , , , , , , ,

香港揸車遇到最大嘅問題一定係泊車嘅問題。莫講話要平時想係街到搵個位泊車,有時就連去一啲熱門嘅商場都要大排長龍,等到傻咗都未可以泊低部車。講真有時塞車都係因為大家都係等泊車,尤其係啲人多嘅區分。香港泊車位其實係嚴重短缺,你估啲人真係想違例泊車咩?就算有停車場,有啲收費真係嚇死你。有時唔係加價就可以減少路面嘅車輛,而係有無足夠嘅泊車空間。

港海灘


個人分享
Tagged With: , , , , , , , , ,

每逢假日海灘都真係逼爆人,而自從搬咗去新界之後,可以選擇嘅海灘真係少咗好多。當然另外一個好重要嘅原因係要帶埋郭大少一齊去,所以要搵一啲有好嘅沖涼設施同個灘要大嗰啲先至得。而家每次去海灘都係同郭大少玩沙多,所以一定要帶齊佢啲玩具去同佢玩。最起碼同佢去得多海灘,佢唔怕沙,仲玩得好興奮,有時玩到唔捨得走。如果唔係太大浪嘅話,佢都唔驚咁自己走去水邊踩水!

港公園


個人分享
Tagged With: , , , , , , , , ,

其實我唔知係乜嘢嘅問題,香港啲小朋友好似從來未去過公園咁,一見到有人吹肥皂泡就好似發咗癲咁,一窩蜂咁走埋嚟。老實講有時真係好怕佢哋會整親郭大少,因為佢哋真係為咗追啲波波,其他嘢就乜都唔理。最奇怪嘅係好似全部家長都覺得你吹波波就預咗咁,老實講我係吹俾我個仔玩,但係如果啲波波飄咗去第二度,我無所謂,但係唔係企係我面前或者身邊等我娛樂你哋!

去沙灘


個人分享
Tagged With: , , , , , , , , ,

「香港」

係香港去沙灘真係幾考功夫,因為如果係假日,只要天氣好啲基本上全港嘅沙灘都會逼爆人!如果揸車嘅話仲大鑊,事關真係可以連位都無泊!最灰嘅係去到俾啲警察叫你掉頭,話無位泊,個陣時真係兩頭唔到岸!而好多時香港啲沙灘真係可以好污糟,不單止雜物多,有時真係啲水混濁到乜都睇唔到。一個唔小心,真係唔知踩到啲乜。但係始終去沙灘同泳池係有好大嘅分別!

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。