嘥鬼氣

好多香港人嘅目標就係盡量賺錢買樓供樓,鬼唔知咩!講咗咁多年都係嗰三篤屁,雖然你話唔連任者,但係個施政報告真係可以用交功課嚟形容。將民生嘅設施改建成展覽場地,講真無其他地方可以起咩?點解係要係灣仔?又係度話自己過去四年施政無走數,你估你係奧巴馬咩?人哋就真係無走數嘞!講來講去都唔知有乜嘢真係幫到香港,不過算啦,反正你都就快卸。雖然唔知下個特首係邊個,但係今年嘅施政報告真係毫無可取嘅地方!

不連任

過去四年香港真係變咗好多,由四年前嘅特首選舉開始就已經知道依家個位特首唔慌係好嘢,當然時間證明咗佢做特首有幾大鑊。老實講真係每次鑊鑊新鮮鑊鑊金,越搞越大單嘢。好啦終於捱到佢嘅任期屆滿,出年就係特首選舉,今個星期就係選委會選舉,而好多政團都以踢走梁振英為政綱,因為如果佢再做多四年香港真係無法想像會變成點!當然最近有好多疑似參選人話有機會出嚟參選,但係到嚟一刻都仲未宣佈。所以究竟邊個會係下一個香港特首真係好難估!

漏咗嘢

「官威」

一件行李就已經可以睇到乜嘢叫做官威!但係區區一個香港特首真係以為自己大晒,其實到最後都只係中國咁多個省市入面嘅一個非常渺小嘅行政長官。佢真係憑乜嘢覺得自己可以目無法紀,想點就點!要人哋叫你做特首都要人哋心入面服至得㗎!就算人哋唔叫你做特首,講真香港有邊條法例列明見到你一定要叫你特首先?梁生,唔該你唔好以為真係一人之下萬人之上啦!

蔡英文

「台灣」

去舊立新,四年過去蔡英文再次挑戰總統之位,但係今次終於兌現佢嘅承諾將四年前落敗嘅時候大家嘅淚水變成笑容!台灣過去嘅問題其實同香港都係好相似,但係台灣最起碼可以一人一票選總統,命運完全係掌握係台灣人嘅手裡面!今次民進黨完完全全擊敗國民黨,好明顯反映咗民意,而台灣人求變嘅心態係今次嘅選舉結果話俾全世界聽!台灣新嘅時代來臨,唔知幾時先到香港呢。。。

被滅聲

「滅聲」

狼嘅本性真係死性不改,連自己個女都要滅聲。雖然對「梁齊昕」無乜好感,可以話幾乞人憎。但係隻狼做老豆做到咁,唔怪之得連做特首都做成咁嘅死樣。其實就算個女唔講,大家都知佢係啲乜嘢人。重點係隻狼有乜嘢權利去管一個成年人嘅生活呢?個女都二十幾歲人,日日爆你大鑊,你估佢真係唔驚咩?

 
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。
  • 放閃日其實放閃係一個網絡嘅用語,主要係用嚟形容啲人係網上面炫耀自己。當中用得最多嘅係情侶之間互相公開自己嘅幸福同快樂,尤其係一啲單身人士搵到伴侶之後不斷發放相片炫耀自己嘅幸福。好多人會用閃光彈嚟形容,而回覆嘅通常係帶上黑超嘅表情符號,因為閃光彈好刺眼,所以要帶返副黑超擋一下啲耀眼嘅光芒!所以每逢情人節好多人都會通過唔同嘅渠道放閃!
  • 數據先好多公司都會有唔同嘅數據,但係到最後仍然解答唔到一啲商業上嘅問題。原因其實唔係出於數據,而係無人去設計點樣收集數據。就算有數據都唔知啲數係啲乜嘢情況下收集返嚟。最終導致啲數據無法解釋日常業務嘅問題!可多公司都低估咗收集同分析數據所需要嘅人力以及資源,通常都係到咗分析嗰一刻先至發現問題。所以點樣收集數據係緊要過點樣分析數據!
  • 被截停當然警察如果遇到或者發現可疑嘅車輛係有權利去截停佢,但係只不過如果因為要截停可疑嘅車輛所導致嘅傷亡係唔係有必要呢?其實係好幾年前香港警察曾經截停路面嘅私家車做路障,希望截停可疑車輛而導致安份守己嘅市民有性命財產嘅損失。而近日亦有類似「人肉路障」嘅事件發生,今次就導致兩死五人受傷。老實講點解要市民用自己嘅性命同財產去幫你截停可疑車輛先?