買生果

近幾年真係越嚟越多人去果欄買生果,而我大部份嘅時間都係去買士多啤梨,車厘子同水蜜桃。因為呢三樣嘢真係比較抵買,價錢一定比超級市場平,而且一定靚過超級市場嗰啲。所以識買生果嘅人都會去果欄買,當然亦有好多公司會係大時大節嘅時候去果欄買生果嚟送俾啲客!但係今年車厘子遇著農曆新年,真係多人到爆,今日去到基本上好多生果都已經賣晒!

車厘子

「好味」

有時真係幾得意,係澳洲嘅時候好少食車厘子,但係因為見到啲人去果欄買啲好鬼大粒嘅澳洲車厘子返屋企食,所以同老婆都試下。一試之下真係無得返轉頭!不過最大問題係你要一盒一盒咁買,我哋兩個人食都要食幾日。當然咁樣買嚟食一定抵過係出面超級市場咁買。講真粒車厘子有成個一蚊銀咁大真係好好食,最重要嘅係真係好鬼甜囉!所以依家每年都會去果欄買嚟食

水蜜桃

「時令」

嘩!又係到咗食「水蜜桃」嘅季節啦,識食就梗係食日本嘅「水蜜桃」啦!真係又大,又甜,又香,又多汁!見到都流晒口水!所以每次揸車經開油麻地果欄就一定會停一停,咋咋臨去買返兩個返屋企食,而返到屋企就梗係即刻放入雪櫃冰冰佢,等幾個鐘之後先拎返佢出嚟食。但係每次都唔敢買咁多,因為好快熟。所以一個起兩個止。

去果欄

「果欄」

油麻地果欄,大部份香港人簡稱「果欄」,係香港主要嘅水果批發市場。佢位於九龍油麻地,北臨窩打老道,南抵石龍街,西為渡船街,東為新填地街。果欄係建於1913年,以前係九龍水果批發市場,「果欄」係珠三角一帶水果批發市場嘅俗稱。經營嘅商鋪初期只係用草棚搭成,直到1920年代至1930年代,香港政府才開始批地俾欄商興建固定樓房,大多數係一兩層高嘅磚石建築以逐漸組成今日嘅貌貌!

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁!
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你!
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友!
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。