談施政


個人分享
Tagged With: , , , , , , , , ,

一份好嘅施政報告,除咗要解決社會問題之外,最重要嘅係要執行。如果單單只係寫出嚟,其實意義不大。好多都只係一個理想,到最後做唔做到先至係重點。好多時啲政策都係做啲唔做啲,有頭無尾,甚至乎無一個延續性。所以好多時係施政只為短期目標而缺乏長遠發展嘅目光,搞到香港人無所適從,更嚴重嘅係影響香港嘅競爭力同經濟發展。你又點睇今年嘅施政報告呢?

新班子

一個團隊要有效咁做到一啲成績俾人睇係要用人唯才,之前我哋嗰位候任特首林鄭月娥曾經講過佢嘅原則係要廣納賢能。所以好多人都係度等緊佢所謂嘅新政府,新管治係點。究竟三司十三局會係由邊個擔任,因為好多人都已經對今屆嘅政府有好多不滿。如果無乜嘢大嘅改變,基本上係今屆政府嘅延續版。要香港走出過去幾年嘅困局,相信都幾難。而今日終於揭曉佢所謂嘅新班子!

柒柒柒

有啲人話前幾日大家係度發緊夢,而今日大家終於瞓醒!當然人係需要發下夢,如果唔係又點會有機會改變?當然係點票嗰一刻真係希望薯片叔叔會成為我哋嘅特首,只不過心底裏亦都知道嚟個可能性極低。有時唔係淨係睇黨派咁簡單,就算明知係建制派又如何,最起碼佢真心為香港!所以一個人嘅品格係更加重要!如果你認為六八九嚟隻狐狸無品嘅話,咁柒柒柒嚟個奶媽會比隻狐狸更加無品。

論壇戰

今晚薯片叔叔真係不斷擊倒奶媽,單單話奶媽係網上直播嘅「嬲嬲」已經上到鼻就已經笑到碌地!再加上之前奶媽話如果民意唔支持自己嘅話就會辭職,所以薯片就用最新嘅民調狙擊奶媽,而最新嘅唔支持率係百分之四十五,即係未上任淨值已經負數,問佢係唔係應該考慮退選。當然奶媽又走出嚟認叻話某個民意調查話佢已經超越薯片!其實邊有可能呀?所以薯片即刻反問奶媽佢竟然相信嗰個調查!

入閘啦

相信好多人都好關心究竟曾俊華同胡國興夠唔夠提名票入閘參選特首。三月一日就係特首選舉提名期嘅最後一日,因此係嗰日之前要得到一百五十名選委提名先至有機會去參選。當然林鄭月娥得到一大班建制派支持所以好早就已經得到所需要嘅提名票。當然提唔提名係選委嘅選擇,所以提名期只係一部份人將會投票嘅意向。而如果按照目前嘅提名,應該已經超過六百個選委已經表態。當然最終都要到選舉當日先至知道最終嘅結果。

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁!
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你!
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友!
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。