漫畫書


個人分享
Tagged With: , , , , , , , , ,

細個嘅時候好多時都係睇卡通片,但係就唔知原來卡通片其實好多時都係因為有漫畫先。香港真係少咗好多淨係賣漫畫嘅商店,而最近期睇過嘅漫畫應該係進擊的巨人。當然唔同人有唔同嘅喜好,有啲鍾意睇美國嘅漫畫,有啲就鍾意睇日本嘅,當然仲有香港本地嘅漫畫啦!好多時漫畫都係虛構出嚟,不過有時亦都有啲係反映當時嘅社會文化,就好似大家熟悉嘅老夫子。

玩完啦

今日係最後一日係大阪,返香港之前我哋食完早餐就同郭大少去過一個室內兒童遊戲室玩。去到嘅感覺同香港嗰啲好唔同,地方大之餘就係入面有好多唔同嘅設施比唔同年紀嘅小朋友玩。最大分別就當然係日本嘅小朋友真係同香港嗰啲好唔同,佢哋唔會好似香港啲小朋友咁玩到癲喪乜都唔理,而啲家長都會睇住自己啲小朋友,見到細個佢哋嘅小朋友都十分禮讓。嚟個就係文化嘅差異!

大阪遊

整體上去到大阪之後,感覺好似東京,人多車多。當然遊客都好多,去到心齋橋真係好多藥店,而且係入面做嘢嘅人好多都係中國人,甚至乎係鋪頭門口用普通話拉客。大阪都真係幾大,如果要玩嘅話真係都要去多幾日先至得,不過你問我嘅話我都係鍾意啲郊區地方。或者因為年紀大,除咗搵好嘢食之外,其實我都真係鍾意去睇風景,去一啲比較少人去嘅地方。

去大阪

經過咗咁多日嘅北海道行程,我哋終於要離開札幌嚟個城市出發去大阪。北海道真係好大,當然今次只係去嘅目的只有一個就係去睇花,真係非常好幸運天氣好好無落雨,不過就真係晒到燶咗,我哋離開咗之後就陰天同落雨!當然睇花就要影花,雖然超級晒,但係有太陽同藍天所以啲相影出嚟真係好靚!我哋仲有好多地方我哋仲未去,希望下次再去嘅時候可以再去多啲地方。

札幌市

北海道真係好大,相信我哋應該會再返嚟玩。整體感覺唔錯,不過啲路比起之前去過的地方就差啲,而今次真係無乜去食好嘢,因為郭大少真係唔可以太過夜瞓。我哋每晚都好快食完就同佢返酒店同民宿沖涼瞓覺。不過今晚就去咗食當地比較出名嘅牛,雖然唔係我哋食過最好食嘅但係都不過不失。今日亦都係我哋最後一晚係札幌,聽日我哋就會出發去大阪。希望好快我哋再返嚟啦!

 
  • 你可以早前睇到一位朋友分寫咗一篇文章,睇完之後有點當頭棒喝嘅感覺。我哋係嚟個城市,嚟個世代生存,每個人都好努力咁為生活而奔跑。當然世界會變,而好多時亦都因為大家成長嘅年代唔同,亦都經常以一副我食鹽多過你食米嘅態度,慢慢覺得一代不如一代。但係我哋曾幾何時亦都俾上一代給予同樣嘅批評?只係時代唔同咗,與其抱怨社會只會越嚟越差,但係點解又唔諗下點樣令佢變好呢?
  • 港德育教育小朋友除咗學術方面之外,其實個人認為比學術更加重要嘅係德育。因為德育係要由細開始培養,而學術真係幾時都學得到。一個小朋友成長後點樣待人處事其實係書本入面係學唔到嘅。唔同嘅國家有唔同嘅標準,亦都因為小朋友大部份成長嘅時間係校園,所以要選擇一間好嘅德育其實係重要過一間只係專注學術嘅學校。就算讀書又幾叻都好,如果無好嘅品德其實就已經大打折扣。
  • 標誌論相信大家日常都會接觸到唔同公司嘅標誌,只不過有幾多人會知道標誌背後嘅意思?當然好多時都要問下設計師點解會有咁嘅設計。人一般處理圖像比較快,所以係生活上好多嘅嘢都會利用標誌嚟代替文字。我哋最常接觸嘅就一定係路牌,好多一睇就明白當中嘅意思。當然有時亦都會遇到一啲比較差嘅設計,除咗無達到標誌嘅目的,反而更能原本嘅意思更加混淆。
  • 食老本相信好多人都會問究竟IBM而家究竟係一間乜嘢嘅公司?其實作為前員工,我都會問同一個問題。因為換咗行政總裁之後,老實講真係唔知做緊啲乜嘢。大部份人仍然停留係當年賣電腦嘅年代,只不過自從佢哋將整個個人電腦部門買咗俾聯想之後,其實就一直不斷轉型。當中最主要嘅仍然係諮詢服務為主,提供唔同嘅企業方案,而另一樣嘅就係人工智能。