一八年


個人分享
Tagged With: , , , , , , , , ,

每年嘅第一日都會寫今年會做啲乜,不過今年應該唔會再講希望今年會點樣。抱著平常心過每一日應該係最好,因為無期望就無失望。所有嘢都隨遇而安,可以將上年嘅問題解決晒就已經好好。所以今年只係希望做好每一件事,繼續開開心心咁睇住郭大少成長就已經足夠。當然心底裏依然有無數嘅希望,最希望嘅係搵到一個新嘅方向可以令自己舒服啲。

過完年


個人分享
Tagged With: , , , , , , , , ,

忙完一整個星期,咁就過完個新年。今年真係忙到傻咗,但係好開心因為第一整咁多糕送俾朋友。每晚夜麻麻做晒所有嘢,等郭大少同老婆瞓咗之後先至整。真係唔數唔知自己整咗十八底糕,而大部份都係好多人食完都話好食嘅黃金奶黃年糕。而今年最特別嘅就係自己第一次整蘿蔔糕同芋頭糕!雖然仲有好多地方要改進不過真係幾滿足,事關自己整嘅真係唔同啲!

掃街去


個人分享
Tagged With: , , , , , , , , ,

每年一到農曆新年就會有好多唔同嘅夜市,而每年其實都係得農曆新年嚟段時間先至有街邊檔出現。嚟個其實係香港嘅特色,因為以前細細個香港係有好多街邊檔,只不過而家基本上好難有機會見到街邊檔。雖然而家無咗以前個啲路邊檔,不過一到新年其實好多人都好期待去掃街。但係啲嘢好唔好食就見仁見智,而事實上好多都一般般,只係大家都想趁下熱鬧,感受下傳統嘅香港特色。

放霧霾


個人分享
Tagged With: , , , , , , , , ,

我其實好鍾意影煙花,真係有諗過連續影十二年,將十二生肖嘅煙花匯演都影晒。我有一年真係好早去到尖東海旁去霸位,但係真係好天曬落雨淋。不過如果講地點嘅話真係最近同最有利!影煙花真係好睇天氣,所以有時天氣唔好,雲層低,無乜風嘅話,影完第一輪之後基本上好多時都係影煙多。有時真係睇彩數,而之前影咗四年,印象中只有一年真係講得上天朗氣清。

年廿八

仲有幾日就係農曆新年,相信好多人都忙緊準備過年嘅嘢,而年廿八就當然係執執嘢,將啲唔要嘅嘢揼咗佢,希望送舊迎新。而洗完邋遢之後就要過咗年初五先至可以打掃屋企。其實而家真係無乜可能咁多日都唔打掃屋企囉,唔通將啲垃圾擺係屋企咁多日咩。所以傳統嘅嘢真係有時諗唔明,就算係因為保留財氣之外,其實做乜嘢唔可以打掃呢?唔知大家今日有冇洗邋遢呢?

 
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。
  • 放閃日其實放閃係一個網絡嘅用語,主要係用嚟形容啲人係網上面炫耀自己。當中用得最多嘅係情侶之間互相公開自己嘅幸福同快樂,尤其係一啲單身人士搵到伴侶之後不斷發放相片炫耀自己嘅幸福。好多人會用閃光彈嚟形容,而回覆嘅通常係帶上黑超嘅表情符號,因為閃光彈好刺眼,所以要帶返副黑超擋一下啲耀眼嘅光芒!所以每逢情人節好多人都會通過唔同嘅渠道放閃!
  • 數據先好多公司都會有唔同嘅數據,但係到最後仍然解答唔到一啲商業上嘅問題。原因其實唔係出於數據,而係無人去設計點樣收集數據。就算有數據都唔知啲數係啲乜嘢情況下收集返嚟。最終導致啲數據無法解釋日常業務嘅問題!可多公司都低估咗收集同分析數據所需要嘅人力以及資源,通常都係到咗分析嗰一刻先至發現問題。所以點樣收集數據係緊要過點樣分析數據!
  • 被截停當然警察如果遇到或者發現可疑嘅車輛係有權利去截停佢,但係只不過如果因為要截停可疑嘅車輛所導致嘅傷亡係唔係有必要呢?其實係好幾年前香港警察曾經截停路面嘅私家車做路障,希望截停可疑車輛而導致安份守己嘅市民有性命財產嘅損失。而近日亦有類似「人肉路障」嘅事件發生,今次就導致兩死五人受傷。老實講點解要市民用自己嘅性命同財產去幫你截停可疑車輛先?