讀書為


個人分享
Tagged With: , , , , , , , , ,

今年真係不斷教書,但係有時真係遇到一啲好奇怪嘅學生。有時心諗其實佢哋究竟點解返學?當然好多人都會選擇去繼續進修,而好多時都係要真金白銀咁俾錢去讀。既然俾咗錢咁點解又唔認真咁去讀呢?唔通真係諗住隨隨便便上完堂,考個試,然後就拎完張證書,等自己可以升職加薪?乜讀書唔係為咗增進知識?嘥咁多錢同時間,為嘅係啲乜嘢呢?如果係咁不如唔好讀啦!

又教完

今年真係有大部份嘅時間都係教緊書,有時真係好佩服全職教書嘅朋友!因為教書真係挑戰聲帶嘅極限,最瘋狂嘅係一個星期教四日,有時仲要連續講七八個鐘頭嘢。其實教書真係好攰,所需要嘅體力真係唔可以低估,教完之後基本上個人只係想靜靜哋休息下。雖然之前都有返開大學教書,但係都只係一個星期一日,而且只係三個鐘,而同而家比真係覺得輕鬆!

包生仔

其實好多時有啲客都會問我如果搵我做數據分析,可唔可以保證做完有成績睇!通常我都會話無可能,因為每間公司嘅環境唔同,客戶群唔同,策略唔同,產品同服務都唔同!所以我係無可能包生仔,我只可以話俾佢哋知我哋常見嘅問題,一般嘅處理方法,同過往做嘅分析嘅經驗。當然有啲客堅持要我哋保證有成果,不過我都係嗰句,無可能!因為數據都唔係萬能㗎!

返校園


個人分享
Tagged With: , , , , , , , , ,

有時我都係度笑自己,因為自己十幾年前有書唔讀走去創業,而家反而每年都有幾會返大學。雖然角色唔同咗,感受亦都唔同咗。每年都會因應市場嘅變化去調整自己嘅教材,務求將最新嘅知識同經驗傳授俾班學生。雖然有時話去教書,其實另一方面係去學嘢,因為係一班年輕人身上係可以學到好多嘢。今日又係新一年嘅開始,希望佢哋唔會俾我嚇親。今年應該係過去咁多年最多人報名嘅一次。

課室外


個人分享
Tagged With: , , , , , , , , ,

「教書」

過去幾年一直都係大學幫手教書,雖然只係每一個學年教一個同數據分析有關嘅科目,但係唔經唔覺嗰班學生都已經投入社會工作。當然好高興好多都有一個好嘅發展。其實教書就係咁,希望啲學生有一個好嘅出路,而近期都係唔同嘅場合見返自己嘅學生。雖然只係同佢哋相處咗十三個星期,加埋考試都係得四十幾個鐘,但係慶幸佢哋都會記得我!

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。