好忙呀

我諗好多人都唔明新任律政司長鄭若驊點解可以買咗間屋咁耐都無發覺自己間屋其實係有僭建!當年特首嚴厲打擊違例僭建,依家佢又會點樣處理?而鄭若驊竟然話自己工作太忙,太多嘢做所以無為意有違規!嚟個解釋真係好難去理解,更何況佢係一位律師?有好多嘢其實係唔需要搵專業認可人士都可以知道間屋係有僭建。嚟個真係關乜嘢警覺性及政治敏感度不足咩嘢事?

三子案

香港社會點解撕裂?好明顯就係因為政府講一套做一套!嗰頭話要聆聽年輕人嘅聲音,轉過頭就要覆核刑期!一時強調法律,一時強調包容,但係就因政治立場而各有不同嘅緣故!其實都已經預咗個政府係咁,講就好好聽,而且仲大條道理,咁仲講乜嘢無政治考慮?年輕一代係社會嘅未來,一個民主嘅社會係唔應該打壓唔同嘅聲音。官逼民反,道理好簡單,何必要處處逼人?

林子健

老實講,一開始聽到有民主派嘅人俾內地執法人員擄走,當然覺得好離譜。但係諗深一層就真係有少少奇怪,因為無啦啦劉霞會想要一張美斯嘅簽名相?點解一個人被人虐待之後,竟然唔係去醫院而係返屋企沖涼?最神奇嘅係咁多訂書釘,唔通真係唔痛,點解仲要開咗記者會先?真係好多問號!究竟係真係俾人擄走虐待,定係一個自編自導嘅故仔?無論係點,都真係要查清楚先至知道。

估唔到

近排真係講好多關於政治嘅嘢,不過真係日日新鮮。當然好多人而家嘅焦點都係放咗係兩個司長身上,一個真係估唔到咁離地,就連八達通都唔知點用,屋企無廁紙但係又唔知便利店無,甚至乎今時今日連一個社交網站嘅專業都無嘅人,講真離地到一個地步你會質疑點解佢可以做政務司司長。仲話佢嘅職責係解決民生事宜,長遠規劃社會基建,以及制定人口政策。如果佢做特首嘅話,可想而知會有幾大鑊!

薯片叔叔

參選了

好多人都會話邊個做特首都唔關自己事,因為到最後都唔係佢哋選出嚟。就算民間呼聲再高有點?因為到最後都係由嗰一千二百個選委去決定。雖然嚟嗰係事實,但係大家又唔可以話民意唔會影響結果。就好似當年唐英年落敗一樣,當然無人可以擔保佢做特首會唔會比梁振英好,只不過佢當時有太多負面嘅新聞。講到尾其實邊個係特首係會影響民生,所以唔好話唔關自己事!

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁!
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你!
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友!
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。