雨過後

「雨傘」

今日係雨傘運動嘅一週年,相信好多人都唔會忘記嚟一日。對於香港嚟講,係一個歷史嘅日子。其實到咗呢刻我都唔係太相信香港政府竟然係一年前出動防暴警察去驅趕手無寸鐵嘅市民。而經過咗七十九日嘅雨傘運動,香港人最後得到啲乜?其實係政制上冇乜大嘅改變,就算最後政改因為建制派嘅蝦碌事件導致無法通過,好多香港人其實仲未醒覺。當然會唔會再有同樣嘅抗爭?我諗好難再有咁嘅機會。

七月一

「回歸」

唔經唔覺香港已經回歸咗十八年!所謂嘅五十年不變係唔係真係無變過?如果你問我,我會同你講變咗好多!就算只係返咗嚟好幾年,但係已經感受到個變化。雖然話自己都係內地生活過五年,但係香港始終係香港,係應該有自己獨特之處。香港原本有嘅優勢慢慢流失,而一個健全嘅社會係應該有多元化嘅發展。不過回歸之後就樣樣嘢都一步一步倒退。

豬一樣

「延續」

我真係好少會連續兩日寫類似嘅嘢,不過真係太好笑,所以再寫多篇。我重複睇咗「政改」表決段片好多次,真係睇咁多次笑咁多次!點解嘅?真係㗎?裝越位都唔識裝,真係輸波係有奶油!「建制派」今鋪真係聰明反被聰明誤!重要低智能咁不斷澄清,真係算吧啦!千年道行一朝喪,唔知支持佢哋嘅人會唔會「票債票償」!有票真係唔要嘅超經典示範!今次完全係技術性嘅出錯!

一百日

「算帳」

嚟個政府真係好識計數,次次都係陰陰濕濕咁做嘢。當「雨傘運動」啱啱過咗「一百日」,佢就即刻開始第一波「預約拘捕」算賬行動,「秋後算帳」。原因好簡單,因為聽日佢哋就會係立法會開會嘅時候就啟動政改第二階段諮詢公作。林鄭月娥將會係立法會宣讀聲明,啟動為期兩個月嘅政改諮詢。如果個個議員俾你拉咗,係唔係會易啲通過方案?

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁!
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你!
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友!
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。