兩歲半


個人分享
Tagged With: , , , , , , , , ,

唔經唔覺由港島東搬咗嚟新界西兩年,當初都係希望郭大少有多啲地方走動同空氣會好啲。雖然從來未住過九龍同新界,而家就慢慢習慣咗。不過又開始諗郭大少讀書嘅嘢,所以又係時候諗下係唔係要搬去第二度。今時今日係香港讀書真係慘,但係無辦法個遊戲規則就係咁,如果政府同學校一日都唔改,最後唔係辛苦我哋嘅下一代,而係連父母都辛苦埋一份!

十六歲


個人分享
Tagged With: , , , , , , , , ,

自從郭大少出咗世之後,我哋真係小咗理大佬。有時真係覺得冷落咗佢,因為就連佢最鍾意瞓嘅窗台而家都好少去瞓,事關好多時怕啲貓毛搞到成床都係,影響郭大少。與此同時每日因為搞完郭大少同自己嘢之後已經好鬼攰,所以真係好耐無同佢玩佢最鍾意嘅毛毛棒。當然佢知道我哋忙,所以都好少搞我哋,而到咗夜晚佢通常都會坐埋一邊陪我做嘢,有時真係有啲虧欠咗佢!

廿九個

究竟郭大少返學係點嘅呢?今個月係人生第一次去家長會,其實都估到一二,不過見到佢係學校好開心就已經足夠。雖然香港嘅教育真係幾變態,因為佢始終都係一個兩歲人仔,見到佢一日一日長大就得啦!不過兩歲嘅人仔真係茶煲,經常性同你唱反調,又堅持樣樣嘢都要自己做,唔啱心水又發脾氣,但係又真係正常,因為每個小朋友都會經歷呢個階段,只係我哋真係俾佢激死!

廿八個


個人分享
Tagged With: , , , , , , , , ,

返咗學嘅郭大少真係好唔同,最大嘅分別就係佢越嚟越多嘢講,有時真係講唔停。而家經常話自己大個仔,樣樣嘢都想自己做,有時想話幫佢但係死都唔俾人幫。其實某程度上係一件好事,不過有時真係太過固執。不過相信每個小朋友都會經過咁嘅階段,見到佢每日嘅成長再相比起自己細個,分別真係幾大。時代真係唔同咗,現今嘅小朋友真係太過聰明,唔好低估佢哋嘅能力!

西灣河

我諗無人會唔知邊度係西灣河,細個嘅時候一家人住係康怡花園,去西灣河通常都係同嫲嫲一齊落去買餸。之後返到嚟香港大部分時間都係住係西灣河,所以由細到大自己基本上係港島東長大。好多人或者會覺得西灣河係一個比較舊嘅地區,但係其實如果你住過西灣河之後或者你有另外一個睇法。雖然西灣河話大唔大,話細唔細,但係就真係乜都有,真係一個好方便嘅一個社區。

 
  • 數據先好多公司都會有唔同嘅數據,但係到最後仍然解答唔到一啲商業上嘅問題。原因其實唔係出於數據,而係無人去設計點樣收集數據。就算有數據都唔知啲數係啲乜嘢情況下收集返嚟。最終導致啲數據無法解釋日常業務嘅問題!可多公司都低估咗收集同分析數據所需要嘅人力以及資源,通常都係到咗分析嗰一刻先至發現問題。所以點樣收集數據係緊要過點樣分析數據!
  • 被截停當然警察如果遇到或者發現可疑嘅車輛係有權利去截停佢,但係只不過如果因為要截停可疑嘅車輛所導致嘅傷亡係唔係有必要呢?其實係好幾年前香港警察曾經截停路面嘅私家車做路障,希望截停可疑車輛而導致安份守己嘅市民有性命財產嘅損失。而近日亦有類似「人肉路障」嘅事件發生,今次就導致兩死五人受傷。老實講點解要市民用自己嘅性命同財產去幫你截停可疑車輛先?
  • 搭巴士香港人好依靠公共交通工具,尤其係巴士。有時揸車嘅時候真係會遇到一啲罔顧乘客安全嘅巴士司機。近年真係發生咗唔少嘅巴士意外,有啲都幾嚴重。作為一間巴士嘅營運商,聘請巴士司機嘅時候應該係要非常嚴謹,除咗要有定期嘅評核之外當然亦要給予足夠嘅培訓比車長。講到尾,一架載滿人嘅雙層巴士有一百人以上,如果出現意外嘅話係會造成嚴重嘅傷亡!
  • 大風雪雖然以前住大連嘅時候,冬天落雪係好正常,不過真係好多年無去過落雪嘅地方。一般落雪嘅地方都會有暖氣,所以其實係室內都唔會太凍。不過一出去就會凍到變雪條!最記得有一次去芬蘭工作,因為大風雪搞到班飛機遲咗一個鐘頭先至降落,一落機先知到真係好誇張,應該係咁多年遇到嘅最大風雪。不過落雪真係好靚,白濛濛一片真係好舒服!