零網絡

依家科技發達,好多嘢都唔同咗,就好似以前約人咁,話咗幾點係邊度等就會好準時咁等對方。而家就真係好難啦,因為分分鐘一個短訊話嚟唔到就已經放咗你飛機。而去旅行嘅話,其實係應該去感受當地嘅風土人情,但係而家好多時大家都只係顧住影相,分享,機不離手。講真有時真係覺得去到一個病態嘅地步。與其大家問點解啲人無社交媒體,倒不如自己試下無網絡嘅日子!

腦朋友

「人生」

每個人由出世開始就慢慢懂得「喜怒哀樂」而不同嘅情感就隨著年齡開始慢慢發展。「玩轉腦朋友」正正講述每個人由出世開始到長大成人都由「快樂」,「悲傷」,「憤怒」,「厭惡」同「恐懼」組成再發展出唔同嘅性格同人生觀。當然人生有不同階段,所以慢慢由簡簡單單嘅生活,變得越來越複雜。雖然係一套卡通片,不過背後帶出嚟嘅信息,相信要大人先會深深明白箇中嘅意思。

港移民

「移民」
近排好多人都討論緊移民嚟個問題。但係移民就可以解決現今香港嘅問題?我自己覺得移民係逃避同放棄。不過站係父母嘅立場係為仔女將來,所以我亦明白佢哋嘅出發點。因為我好細個跟咗我屋企人移民咗去澳洲,所以明白佢哋嘅諗法同多謝佢哋俾我有多一個選擇權。但係點講都好,我係香港出世,我好自豪自己係一個香港人!因為香港始終係我哋嘅根。

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。