一歲半


個人分享
Tagged With: , , , , , , , , ,

而家啲細路真係唔可以用我哋以前嘅標準去衡量。佢哋學嘢嘅速度一定比我哋嘅年代快。有時同郭大少去返學真係睇到唔同嘅小朋友係有唔同嘅性格。不過雖然佢個性比較急,但係見到佢有進步都好開心。而家佢真係好有性格,除咗有自己嘅主見之外,食嘢真係呃佢唔到。佢食之前會望下係啲乜嘢,慌死我哋呃佢咁。其實要郭大少食嘢兼且坐定定嘅話真係難過登天,每日都攪到我哋兩個筋疲力竭!

十七個


個人分享
Tagged With: , , , , , , , , ,

又到咗每月一次嘅回顧,今個月對於郭大少嚟講應該係最繁忙嘅一個月。點解,因為平日要上堂,跟住又有面試,然後就去鹿兒島旅行,返嚟又去咗迪士尼。佢嘅生活真係豐富過我哋。不過真係時代唔同,以前我哋細個邊度有咁多嘢,邊度會同阿爸同阿媽一齊去啲咁遠嘅地方。上年嘅今日先得嗰五個月人仔,肥嘟嘟好得意,但係一年之後就變成咗一隻甩繩馬騮。希望佢繼續日日都咁開心健康成長!

低調啲


個人分享
Tagged With: , , , , , , , , ,

每個人一生都會遇到一啲人好高調咁話自己有幾叻,有幾勁,而當中有啲人確實係勁嘅。但係當中亦有啲係吹水唔抹嘴,認屎認屁嘅人,簡稱魚目混珠,混水摸魚嘅人。最慘嘅係好多人係唔識分辨嚟啲人,如果再加上傳媒廣泛報導,某部份嘅人慢慢就會被繼續塑造成有影響力嘅人。所以高調唔代表一切,因為好多時只係虛有其表,得表面嗰層,到落手落腳做嘅時候就真係見真章嘅時候。所以通常叻嘅人唔會話自己叻,而且佢哋都非常低調。

十四個


個人分享
Tagged With: , , , , , , , , ,

一日一日咁睇住郭大少長大而應該係我每日最希望嘅嘢,因為錯過咗就真係錯過咗。係我眼中佢依然係最特別嘅小朋友,佢其實識好多嘢但係佢表唔表現俾你知係另一回事。相對好多小朋友真係托賴佢健康無乜太大問題,其實已經相當安慰。當然亦都因為老婆嘅功勞,一直堅持餵人奶。相信嚟個亦都係其中一個原因。見到佢每一自由自在,無憂無慮,開開心心就已經好滿足。

十三個


個人分享
Tagged With: , , , , , , , , ,

有小朋友嘅生活真係快到嚇死人,好似無幾耐之前先至話啱啱一歲。有時睇番郭大少啱啱出世啲相真係幾好笑,不過人哋話三歲定八十,我話係三日定八十。點解?因為佢永遠有一個永不改變嘅笑容,好希望佢一直保持嚟個大情大性嘅性格,唔好似我乜嘢事都收收埋埋。今個月終於識得叫「嗲啲」但係其實我一直叫佢嗌我做「爸B」,都唔知佢係邊度學返嚟。

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。