筆記簿

以前做嘢好多時我都會有一本筆記簿記,多數都係寫低自己嘅諗法。唔知幾時開始嚟個習慣唔見咗!雖然自己都有幾本筆記簿,但係真係少用咗好多。本本都用唔晒,但係入面寫嘅嘢,好多到今時今日都仍然有用。有時真係貪方便,用電腦去寫低啲嘢,但係通常寫完就好少再睇返,有時甚至唔知個文件去左邊。而家啲記憶力真係好差,好多嘢都真係唔記得,我諗都係時候要拎返本筆記簿出嚟用了!

新產品

「預期」

又係俾蘋果發布會洗版嘅一日。今日個個係度討論邊個啲新產品,不過好似今次嘅反應有啲唔同,因為有讚亦有彈。作為一個用家,一個果粉,其實覺得近幾次嘅發佈會越嚟越一板一眼。個格式繼續沿用以前個套,冇乜新意可言,甚至乎有啲悶。但係好明顯蘋果每一次都將科技一步一步向前推進,今次最大嘅話題應該係支筆同蘋果電視。我覺得今次進一步體驗平台融合性嘅重要性!

電訊商

「電訊」

相信每個香港人都會有至少一個手機號碼,而我用咗而家個電話號碼同電訊商十幾年。由以前公司電話,個個月幾千蚊到成萬幾蚊電話費到而家自己每個月俾幾百蚊,點都算係一個長期嘅客戶。但係而家啲電訊商嘅服務質素就每況越下,次次都要打電話上台鬧一餐。最好笑嘅係我合約到期,問佢我有乜嘢選擇,點知講埋晒啲廢話,我要嘅係你話俾我知我作為一個客戶你點幫到我,而唔係照住張傳單讀囉!

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。