國歌法

或者我真係孤陋寡聞,真係唔知全球有幾多國家有國歌法。而國歌法其實係國際上並非主流,再上網搵下,原來只有少數國家例如日本同馬來西亞都有所謂嘅國歌法。國歌係一個國家嘅象徵,如果一個國家嘅人民認同自己嘅身份,而且亦都會感到自豪嘅話,其實又使乜嘢立法呢?咁係唔係代表其他國籍嘅人都要遵守?如果唔識唱國歌嘅話係唔係就代表唔專重?

難服侍


個人分享
Tagged With: , , , , , , , , ,

做乜嘢都好,其實間唔中都會遇到一啲難服侍嘅人。當然嫌三嫌四就不在話下,有時真係吃力不討好。最慘嘅係都唔知啲人乜嘢心態,真係以為俾少少錢就大晒,咁其實同啲暴發戶有乜嘢分別?好多時淨係講客戶嘅權利,咁做生意嘅就無權利?而家真係郁啲就話要投訴,投訴唔得就擺上網。不過大家係唔係都要將心比己呢?如果有一日你俾人擺咗上網公審,你又會點呢?

要認輸

數據係一樣好冷血嘅嘢,而要利用數據去做商業決定嘅話,咁首先就唔好質疑數據,除非啲數據係收集嘅過程就已經出錯咗!如果唔係分析完結果之後,好多時就會出現輸打贏要嘅局面。因此要用數據去營運一間公司嘅話,首先當然要確保數據嘅準確性。無人可以話你所收集嘅數據係百分百準確,因為事實上係好難,只不過如果選擇利用數據就應該尊重個結果!

做艇仔

好多時都會遇到一啲唔同行業嘅前輩,而做人就當然要有禮貌,見到面就自然去打個招呼。只不過有啲人就會覺得你過嚟打招呼係為咗打關係,為咗抓生意,事關你係一間細公司,係佢哋眼中只不過係俗稱嘅艇仔。通常自此之後我唔會再主動去打招呼!其實好多客戶都會直接搵我哋去合作,原因好簡單就係佢哋都知道就算俾大公司做,佢哋做唔嚟,到最後又係搵我哋!

偽教徒

首先我自己係無宗教信仰,而我亦都尊重其他人嘅宗教信仰。只不過好多人話就話自己有宗教信仰,但係佢哋啲行為基本上睇唔出佢哋係一個教徒。而教宗方濟各係今個星期嘅一次彌撒當中,佢痛斥好多教徒都係偽善嘅雙面人!一方面會去彌撒,但係另一方面就說一套做一套!所以與其做咁嘅天主教徒,倒不如做無神論者!只不過係現實生活當中真係有好多嚟啲偽教徒嘅存在!

 
  • 要敢做雖然而家係數碼年代,而廣告亦都分為傳統同數碼兩派。但係做廣告係需要創意,唔係樣樣嘢都只係求回報。我之前亦都講過,數據唔係萬能,而如果太過依賴數據去營運嘅話,基本上係無創意可言。廣告除咗要有創意之外,亦都需要膽量去做。當然有時有啲廣告會太過前衛,引起社會爭議!只不過創作就係咁,唔可以下下都為咗討好市場而做,有時真係要鼓起勇氣踏出一大步。
  • 人揀你而家有好多嘢都唔係話你想點就點,睇落你好似有得揀,但係實際係無得揀。點解?因為唔係你揀人而係人揀你。讀書係學校揀人,搵工係公司揀人,搵生意係客戶揀人,樣樣嘢都係人哋揀你。咁有乜嘢係自己揀?其實就算俾你千揀萬揀,揀完之後人哋話啱嘅話,最後你都無計。當然有時係要檢視自己做選擇嘅時候究竟有啲乜嘢條件係必要,有啲乜嘢只係有會好啲但係非必要,如果唔係其實只係自己開嘅條件太過苛刻。
  • 最後的終於都到咗送你最後一程嘅日子,再唔捨得都要同你講一聲再見。你突然嘅離去其實依然仍未完全接受,希望你去到世界嘅另一端繼續開開心心咁過每一日。咁多年嚟都無送過啲乜嘢俾你,希望最後嘅一份禮物你會鍾意。雖然心情依然沉重,但係見到你安祥,見到你微笑就已經足夠。我會記住你講嘅每一句說話,唔需要擔心我。你永遠都會係我心入面,永別了我最愛嘅爺爺!
  • 秋風起以前嘅香港,四季分明,但係近年就好似無咗春天同秋天咁。話熱就突然熱,話凍就突然凍。太陽落山雖然開始早,六點鐘已經開始黑,但係天氣就好似夏天咁。記得以前細個返學係會教春夏秋冬,而家啲教科書係唔係已經唔需要再教春秋嚟兩個季節呢?如果繼續咁落去,相信香港真係好快再唔會有春秋,只會有冬夏!雖然話鍾意夏天啫,但係今年真係太熱了!