我其實唔鍾意考試，最努力讀書嘅時候應該係高中，因為希望自己考到入自己心儀嘅大學，去讀自己鍾意嘅科目。當然到最後失望而回，但係諗返嗰陣時真係自己最勤力讀書嘅階段。之後隔咗好多年再重返大學已經係十幾年之後，而其實我唔係為求分數，只要畢到業就已經足夠。當然考試係要盡自己最大嘅能力，只不過有時見到自己啲學生無盡力考試嘅時候，其實心入面都會有少少唔開心！

今年見到好多人回顧二零一六年都話今年好多嘢都唔係太好。當然我都有同感，因為生活同工作嘅各方面都唔係太如意。點都好，今日係今年嘅最後一日，所以都係要為今年作一個總結。今年年頭搬咗屋，一家人換咗一個新環境，每日大家嘅焦點都係郭大少。今年同郭大少去咗三次旅行，分別去咗沖繩，蘇梅，同九州。而今年大部份嘅時間其實都係放咗係佢度，因為希望可以同佢一齊成長！

今次嘅假期我諗最興奮嘅係郭大少，因為佢一見到間酒店房個泳池就已經想衝落去游水。今次間酒店房其實都幾大，所以佢基本上可以好開心咁周圍爬，而最近佢好想自己行，所以佢要我哋拖住佢圍住間房不斷行。唔知係唔係心理作用，我同老婆都覺得每次佢去完旅行都好似長大咗。好啦放完假又要回歸現實，因為之後有排忙，真係放完假好似無放假咁。

「睇戲」

今晚終於同老婆去睇咗「狂野時速」，點知越睇越心噏！作為一個小粉絲，由十五年前嘅第一集睇到第七集，每一集都係有驚喜！雖然有啲人覺得有一兩集拍得一般，但係今日睇返轉頭就明白之前所發生嘅每一件事！對粉絲嚟講，每句對白都不只一個意思咁簡單！背後嘅意義到底有幾多人會明？