領導係帶領嘅意思，如果只係一直跟從別人嘅指令去工作嘅話，其實毫無領導可言。而一個成功嘅領導者通常都具備以下嘅五樣特質，當中包括：決斷能力，有同理心，承擔責任，保持樂觀，專注向前！當然領導者亦都有唔同嘅類型，係唔同嘅環境入面會發揮不同嘅作用，所以有時唔係領導者嘅問題而係領導嘅方法未必適合某啲公司嘅文化。用人唯才先至係管理同領導上策！

人一生最重要嘅一樣嘢就係要學識點樣放得低，因為人出世嘅時候係乜都無，離開嘅時候亦都係乜都無。當然人天生係執著，要經歷唔同嘅磨練先至會學會放低。而如果要放低以下十樣嘢嘅話，你又會放得低幾多？當中包括：抱怨，過去，煩惱，自我，脾氣，懶惰，消極，妒忌，猶豫同貪念。人生要活得輕鬆自在唔係一件易事。學識逐一放低其實先至會活得開心。

今年真係有大部份嘅時間都係教緊書，有時真係好佩服全職教書嘅朋友！因為教書真係挑戰聲帶嘅極限，最瘋狂嘅係一個星期教四日，有時仲要連續講七八個鐘頭嘢。其實教書真係好攰，所需要嘅體力真係唔可以低估，教完之後基本上個人只係想靜靜哋休息下。雖然之前都有返開大學教書，但係都只係一個星期一日，而且只係三個鐘，而同而家比真係覺得輕鬆！

係嚟個世界每一樣嘢都會要有佢自己嘅平衡點，如果太過極端化嘅話，問題就會出現。人生由一開始就係不斷咁學習點樣去平衡，只不過我哋會因為唔同嘅環境慢慢走向兩極。雖然人大咗，但係要學識點樣平衡依然係一門好高深嘅學問。就好似大自然咁樣，每個生態系統都有自己嘅平衡點，如果因為某啲環境因素而有所改變嘅話，後果其實有可能好嚴重。所以要搵出平衡點係一件好難嘅事。

每個人都想成功，但係成功嘅背後一定有無數嘅失敗。如果唔面對自己寫失敗，其實係無辦法成功。正所謂失敗乃成功之母，因此好多人都係係失敗中成長。經一事，長一智，所以有時係可以容許別人有犯錯嘅空間。如果沒次都唔容許別人犯錯嘅話，其實到頭來最辛苦嘅係自己。有時太過驚別人犯錯，所以每件事都親力親為嘅話，唔單止其他人唔會成長，就連自己都無機會成長！