二十年


個人分享
Tagged With: , , , , , , , , ,

其實點解香港每年都要慶祝回歸?慶祝咗二十年點解仲要慶祝?要香港人記得同面對香港已經回歸中國嚟個事實?定係要年輕一代記住香港永遠都係中國?點解係五十年不變,唔係二十五年或者一百年不變?點都好,香港曾經係英國嘅殖民地嚟個係事實,香港係中國嘅其中一個城市亦都係事實。無人可以推翻歷史,只不過真係有必要每年都要慶祝回歸嗎?究竟要慶祝幾多年先至夠呢?

超擾民

香港政府真係無嘢搵嘢嚟做,人哋唔知以為香港發生咗啲乜嘢事。我相信習近平去過咁多個國家,應該無一個國家或者城市因為佢去探訪而要勞師動眾,又封路,又整啲巨型嘅水馬圍著佢。就算係嗰啲乜嘢國際性峰會都唔會好似香港咁!搞咁多嘢至可以話勞民傷財,超級擾民。其實香港回歸二十年,唔係應該俾全世界睇究竟香港係一國兩制下有啲乜嘢成個咩?咁搞法真係丟架!

中國化


個人分享
Tagged With: , , , , , , , , ,

「中國」

雖然香港已經回歸咗咁多年,如果你話冇變過就真係呃你嘅!所謂五十年不變,真係有啲呃細路仔嘅感覺!而香港人大部份都好現實,只要有錢搵,唔好影響自己嘅生活就冇問題。如果經濟差嘅話,就係度怨天尤人,之後就話要搵阿爺幫手。而過去咁多年好多人其實淨係搵緊中國錢,但係就忽略咗同犧牲咗好多香港原本嘅特色。咁仲唔係中國化?有時諗返自己係中國做嘢嗰幾年,適應咗當地生活都覺得自己被同化咗!

殖民化


個人分享
Tagged With: , , , , , , , , ,

「殖民」

其實我相信無人會覺得香港仲係係一個殖民嘅時代。講真都回歸咗咁多年啦,如果中國政府同香港政府搞得好,搞得掂嘅話,邊度會有人同殖民時期去比較呢?就係個生活環境越嚟越差,個政府越嚟越廢,所以啲香港人先至有比較。唔好話乜啦,最少八十後個班都好清楚邊個國家嘅政府管理得好啲。除非過多五六十年等我哋死哂,咁咪無人提,無人知同無人記得殖民時代囉!

七月一

「回歸」

唔經唔覺香港已經回歸咗十八年!所謂嘅五十年不變係唔係真係無變過?如果你問我,我會同你講變咗好多!就算只係返咗嚟好幾年,但係已經感受到個變化。雖然話自己都係內地生活過五年,但係香港始終係香港,係應該有自己獨特之處。香港原本有嘅優勢慢慢流失,而一個健全嘅社會係應該有多元化嘅發展。不過回歸之後就樣樣嘢都一步一步倒退。

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。