玩完啦

今日係最後一日係大阪,返香港之前我哋食完早餐就同郭大少去過一個室內兒童遊戲室玩。去到嘅感覺同香港嗰啲好唔同,地方大之餘就係入面有好多唔同嘅設施比唔同年紀嘅小朋友玩。最大分別就當然係日本嘅小朋友真係同香港嗰啲好唔同,佢哋唔會好似香港啲小朋友咁玩到癲喪乜都唔理,而啲家長都會睇住自己啲小朋友,見到細個佢哋嘅小朋友都十分禮讓。嚟個就係文化嘅差異!

去大阪

經過咗咁多日嘅北海道行程,我哋終於要離開札幌嚟個城市出發去大阪。北海道真係好大,當然今次只係去嘅目的只有一個就係去睇花,真係非常好幸運天氣好好無落雨,不過就真係晒到燶咗,我哋離開咗之後就陰天同落雨!當然睇花就要影花,雖然超級晒,但係有太陽同藍天所以啲相影出嚟真係好靚!我哋仲有好多地方我哋仲未去,希望下次再去嘅時候可以再去多啲地方。

札幌市

北海道真係好大,相信我哋應該會再返嚟玩。整體感覺唔錯,不過啲路比起之前去過的地方就差啲,而今次真係無乜去食好嘢,因為郭大少真係唔可以太過夜瞓。我哋每晚都好快食完就同佢返酒店同民宿沖涼瞓覺。不過今晚就去咗食當地比較出名嘅牛,雖然唔係我哋食過最好食嘅但係都不過不失。今日亦都係我哋最後一晚係札幌,聽日我哋就會出發去大阪。希望好快我哋再返嚟啦!

小樽市

係嗰間民宿熱咗一晚之後,當然就係執嘢走人。好彩前晚搵到一間酒店,今晚應該可以有覺好瞓!今朝一起身就見到外面落雨,真係好好彩我哋返到札幌先至落雨,如果唔係落住雨去睇花田都幾掃興!執好晒行李之後,我哋就諗究竟係去行街同去公園,因為啲雨都真係落得幾大。最後決定去咗白之戀人公園再揸車去小樽市食飯同行街。不過因為落雨嘅關係,而白之戀人公園真係無乜嘢做,留咗陣就走了!

返札幌

去到富良野嘅最後一日,玩完之後就開始要回程返去札幌市。嚟幾日真係熱到傻咗同晒到燶咗!不過都係一件好事,因為如果陰天嘅話就好難影到靚相!希望將來有機會再嚟嚟個地方。如果你問我嘅話,我都真係比較鍾意去啲郊外地方。或者我唔係鍾意行街買嘢嘅人,所以去到啲鄉郊小鎮反而仲覺得舒服。如果退休之後可以係嚟啲咁靚,咁休閒嘅地方生活就好啦!

 
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。
  • 放閃日其實放閃係一個網絡嘅用語,主要係用嚟形容啲人係網上面炫耀自己。當中用得最多嘅係情侶之間互相公開自己嘅幸福同快樂,尤其係一啲單身人士搵到伴侶之後不斷發放相片炫耀自己嘅幸福。好多人會用閃光彈嚟形容,而回覆嘅通常係帶上黑超嘅表情符號,因為閃光彈好刺眼,所以要帶返副黑超擋一下啲耀眼嘅光芒!所以每逢情人節好多人都會通過唔同嘅渠道放閃!
  • 數據先好多公司都會有唔同嘅數據,但係到最後仍然解答唔到一啲商業上嘅問題。原因其實唔係出於數據,而係無人去設計點樣收集數據。就算有數據都唔知啲數係啲乜嘢情況下收集返嚟。最終導致啲數據無法解釋日常業務嘅問題!可多公司都低估咗收集同分析數據所需要嘅人力以及資源,通常都係到咗分析嗰一刻先至發現問題。所以點樣收集數據係緊要過點樣分析數據!
  • 被截停當然警察如果遇到或者發現可疑嘅車輛係有權利去截停佢,但係只不過如果因為要截停可疑嘅車輛所導致嘅傷亡係唔係有必要呢?其實係好幾年前香港警察曾經截停路面嘅私家車做路障,希望截停可疑車輛而導致安份守己嘅市民有性命財產嘅損失。而近日亦有類似「人肉路障」嘅事件發生,今次就導致兩死五人受傷。老實講點解要市民用自己嘅性命同財產去幫你截停可疑車輛先?