講營運

「創業」

做生意最緊要嘅係現金流,而好多人創業都先要投資後講回報。當然好多到最後都未到回報期就已經關門大吉,有時就算有幾多資金都好,一日未正式賺到錢其實盤生意都係蝕緊錢。所以其實我好怕嚟啲咁嘅模式,因為真係同賭錢無分別。就算要擴大公司,其實我都好小心,要保證唔會入不敷支。又或者係咁所以唔上唔落,但係最起碼我由始至終都係賺緊錢!

講理念

「理念」

係工作上面,有時真係睇下你好唔好彩,因為要遇到同你理念一樣嘅人其實真係十分之少。而如果你所管理嘅團隊同你嘅理念唔一樣嘅話,有時真係會幾吃力。其實理念係啲乜嘢?簡單嚟講其實係一個願景或者一個共同嘅使命標!當然人嘅目標同理念通常都係相輔相成,而且亦都會隨著時間而改變。但係如果經常改變理念就會令人覺得模糊同無可適從!

識放手

「時間」

其實一個人一日只係得二十四小時,而當中應該有六至八個小時係用嚟休息,三至四個鐘頭食飯,所以基本上用嚟做嘢嘅實質其實得十二個小時。與此同時當你真係由二十歲做到五十五歲,其實講真你得三十五年嘅時間工作。而工作係永遠唔會做完,因為日日新鮮,邊樹真係做得完㗎!當然好多人會話你做嘢效率低,但係就算效率有幾高,聽日咪又有新嘅嘢做!

絆腳石

「步伐」

其實每間公司總會有唔同嘅人,唔同嘅背景。而我經常講大部份嘅員工係工蜂,默默耕耘!但係要係當中突圍而出,其實要比一般嘅工蜂更加努力。點解,因為老闆一般都會俾你行得快,所以要跟得上步伐。另一方面公司請人返嚟係去解決問題,唔係製造更多問題。老實講,如果唔明可以問,但係唔好扮明,話明話明,但係到最後都係唔明,咁咪浪費時間囉!

要謙虛

「成功」

咁多年嚟我培訓過嘅人唔少,而好多時都會留意佢哋自身嘅品德。正所謂少年得志,語無倫次!好多時亦因為天時,地利,人和,而帶俾佢哋名譽,財富,地位,權力!因此不知不覺劍露鋒芒,以為真係一人之下萬人之上。而如果你問我點樣先至係作為一個成功嘅人,除咗別人嘅肯定自己嘅能力之外,其實謙虛係好緊要!

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。