筆記簿

以前做嘢好多時我都會有一本筆記簿記,多數都係寫低自己嘅諗法。唔知幾時開始嚟個習慣唔見咗!雖然自己都有幾本筆記簿,但係真係少用咗好多。本本都用唔晒,但係入面寫嘅嘢,好多到今時今日都仍然有用。有時真係貪方便,用電腦去寫低啲嘢,但係通常寫完就好少再睇返,有時甚至唔知個文件去左邊。而家啲記憶力真係好差,好多嘢都真係唔記得,我諗都係時候要拎返本筆記簿出嚟用了!

視覺差

相信好多人都會睇過一啲同視覺差相關嘅圖片同電影。其實視覺差係因為人類嘅眼睛嘅構造而造成。一個大家都會接觸到嘅例子就係三維電影,要製造立體嘅電影就需要利用特殊嘅眼鏡去將原本兩個唔同角度嘅影像整合起嚟。因為人嘅眼睛只能看到一個獨立圖像,透過特殊眼鏡觀看電影嘅時候就會產生立體嘅感覺。其實做數據分析都係一樣,好多時我哋都需要多一個觀點與角度去分析數字背後嘅意思。

成大業

一間公司或者團隊要成功嘅話其實係要靠所有人嘅努力,當然要成功除咗人之外,就係要不斷有空間去發展。每個機構都係一個金字塔,所以如果個金字塔唔夠高,唔夠大嘅話,其實真係好難有空間俾團隊發展。而係十幾年前啱啱開始帶領團隊嘅時候就已經明白嚟一點,但係唔知係唔係環境唔同咗,自己竟然慢慢忘記咗係大企業入面所學嘅嘢。慶幸今日同一位朋友傾計,如果唔係自己真係唔記得咗我一直相信嘅管理模式!

流程化

好多人都唔明點解啲大公司會有咁多流程。其實睇下你點睇啲流程,如果太過繁複而影響正常工作效率,咁當然係可免則免,但係亦有啲流程係可以令件事做得更加流暢,同時俾所有人一個清晰嘅指引,提高質素之餘亦可以減少錯誤。就算真係錯咗都可以尋根究底,睇下邊度出咗事。不過最緊要就係可以統一員工做嘢模式,更容易管理同擴充。

大公司

「遊戲」

以前係大公司做嘢其實都算好彩,因為大部份嘅上司都唔錯。只不過大公司真係好多流程,所以當你越做得高級,你就越知道個遊戲規則,你就知道點樣可以處理得更快。有時你亦都會好奇點解有啲人可以升職升得咁快,當然唔係個個都係靠自己嘅能力,但係嗰啲人真係好易俾人放逐。所以千祈唔好走精面,如果你個靠山失勢嘅時候,分分鐘連你都唔會有好日子過。

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁!
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你!
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友!
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。