早轉型

公司要轉型其實唔係一件易事,因為通常都會有好多歷史遺留落嚟嘅問題要去面對同解決。如果係一間百年老店就更加難,因為最難處理嘅員工嘅心態。有啲人會覺得係危機,有啲人就會覺得係機遇,所以好視乎員工點樣睇每一次嘅改革同轉型。當然無人可以咁寫包單一定會成功,只不過如果係士氣高昂嘅時候轉型,成功率一定大過士氣低迷嘅時候。

開戶口

仲記得啱啱開公司嘅時候,基本上只要行入去銀行話要開個戶口,跟住填啲資料然後基本上就可以開到戶口。但係今時今日就好唔同,好多要提供無數嘅資料,有啲仲要問你拎唔同嘅文件。如果你係一間新嘅公司,基本上要開戶口真係天方夜譚嘅事。最大問題嘅係有啲銀行要你存入最低戶口結餘,只不過試問一間新嘅公司又邊度有錢呢?而好多初創公司就連業務都未有,邊度搵啲錢比你呢?

撐過去

要成功要經過六個階段?當然首先要確保自己可以生存落嚟,如果唔係講乜都無用!沉潛等待,堅持落去,因為成功係需要時間。要肯定自己過去所累積嘅經驗同實力,要記住自己比想像中更強。要假裝成功,但係假裝成功,唔等於講大話,亦都唔係裝俾人哋睇,而係俾自己睇。好多時會同人比較,但係真係唔好同已經成功嘅人比較,因為好容易令自己陷入自我批判嘅負面情緒中!

創業為

好多人會問創業同做生意嘅分別係啲乜?我個人嘅理解係創業都係一盤生意,但係好多時都係希望去改變現今社會,與此同時好多嘢係由零開始。而做生意其實可以係一啲已經成熟嘅行業,就例如賣衫,做飲食咁,其實唔係一啲乜嘢嘅新嘢,亦都唔會對社會帶嚟啲乜嘢改變。當然到最後創業都係一盤生意,都係要賺錢,而做多時做大咗之後有可能忘記當初點解要創業。

點報價

相信好多做服務性質嘅公司都經常要報價俾客戶,而好多時除咗報價之外都需要先做一份計劃書。不過好多公司只係因為內部流程需要,要搵幾間公司去報價,所以基本上只係陪跑。辛辛苦苦做嘅計劃書對嗰啲公司嚟講只係一份功課,而有啲甚至乎想要你嘅橋,所以有時做又唔係,唔做又唔係。到最後其實就算你份計劃書做得有幾好,你報嘅價錢係幾平與貴都唔係關鍵。

 
  • 儀錶板儀錶板嘅作用係將有用嘅數據呈現出嚟。有好多公司會用嚟監測日常業務,而要有效利用儀錶板首先就要定義佢嘅目的。就好似天文數據一樣,大家都想知道當日最高與最低嘅溫度。嚟個係一個實例,不過要有效咁決定呈現乜嘢數據,最緊要知道數據背後嘅意義同目的。如果儀錶板上面呈現一啲對工作毫無價值嘅數字,咁儀錶板就失去佢嘅意義。
  • 被監控數據係一面雙刃刀,如果用得其所係可以改變世界,但係亦都可以好恐怖。科技嘅發展將大部份嘅設施電子化同網絡化,因此從中可以取得大量嘅數據。如果再加上人工識別功能嘅話,基本上無時無刻你都會被監控。當然咁樣係會觸發私問題,只不過即使你住係一個荒島,其實某程度上都有機會俾人搵到。如果唔想俾人搵到嘅話,分分鐘真係要搵個地下深淵先至得。
  • 新聞業相信傳統新聞業俾人一個感覺就係一個好快俾人淘汰嘅行業,由其依家嚟個世代新聞嘅價值係啲乜,值幾多錢?而家個個都可以拎住部手機上網睇新聞,傳統報紙嘅價值變得越嚟越唔值錢。咁係唔係代表新聞無價值?當然並非如此,只不過要轉型,用一個唔同嘅方法再去令到新聞有返佢應有嘅價值。與此同時要改變大眾嘅消費新聞嘅模式,因為新聞係有價值而唔係免費!
  • 十年了不經不覺已經離開咗大公司十年。究竟自己用咗十年做咗啲乜?如果問心當然理想與現實不相符。有無浪費咗十年?其實又真係好難去量度。十年入面有無成長?或多或少都有啲,當然相比之下的確問慢咗好多!其實過去十年每年都總係有啲嘢發生,忙忙碌碌咁又過一年。自己俾自己嘅期限亦都所剩無幾,雖然人生好難計算,只係又到咗人生交叉點嘅時候。