團年啦

「新年」

話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。

「團年」

年三十晚通常大家都會早啲返屋企團年,而每年都係咁,想早啲收爐都唔得。而今年嘅情況比往年好少少,雖然都係有好多嘢做,但係最起碼知道放完假之後會更加忙。當然忙係一件好事啦,因為開年開得好真係好緊要!團年最緊要就當然係一家人齊齊整整,開開心心啦。過埋今日就係狗年,希望新嘅一年有個新嘅開始,最緊要都係平平安安,健健康康。

「花市」

好多人食完團年飯都會去行下花市,不過人越大就越怕人多嘅地方。所以近年都好少去湊熱鬧,因為最終都會頂唔順,行兩行就會想走。更何況通常去到花市都只係人逼人,完全無辦法睇到嘢。雖然有時真係想去湊熱鬧,但係每年都要提醒自己唔好去,因為每年嘅結果都係一樣。今年都係乖乖咁留係屋企執屋同蒸糕啦!希望今年可以早啲瞓,事關新年真係忙過返工!


Also published on Medium.

Comments are closed.